సిగరెట్ తాగని వారిలో ఊపిరితిత్తుల క్యాన్సర్ కేసులు పెరుగుతున్నాయి: డాక్టర్ల హెచ్చరిక

సిగరెట్ తాగని వారిలో ఊపిరితిత్తుల క్యాన్సర్ కేసులు ఇటీవల పెరుగుతున్నాయని వైద్యులు హెచ్చరిస్తున్నారు. హైదరాబాద్‌లోని ఎంఎన్‌జే ఆస్పత్రిలో ప్రతి ఏడాది 800 నుంచి 1000 కొత్త లంగ్ క్యాన్సర్ కేసులు నమోదవుతున్నాయి. ఈ కేసుల్లో 30 శాతం మంది స్మోకింగ్ చేయని వారు కావడం ఆందోళన కలిగిస్తోంది.

దీనికి ప్రధాన కారణాలు ఇతరులు పొగ పీల్చడం (పాసివ్ స్మోకింగ్), వాహనాల కాలుష్యం, పారిశ్రామిక పొగ, రోడ్ల దుమ్ము ధూళి (PM2.5) అని డాక్టర్లు తెలిపారు. ఇంట్లో స్మోకింగ్ చేసేవారి పొగ వల్ల మహిళలు, చిన్న పిల్లలపై తీవ్ర ప్రభావం పడుతుందని హెచ్చరించారు. వంటింటి పొగతో కూడా మహిళల్లో లంగ్ క్యాన్సర్ కేసులు నమోదవుతున్నాయి.

కొన్ని ఇళ్లలో భూమి నుంచి వెలువడే రాడాన్ అనే విషపూరిత సహజ వాయువు కూడా క్యాన్సర్ ప్రమాదాన్ని పెంచుతుంది. దీన్ని నివారించడానికి కిటికీలు, తలుపులు తెరిచి ఉంచి గాలి వెలుతురు సులభంగా రావాలని డాక్టర్లు సూచించారు.

ఎన్ని మందులు వాడినా తగ్గని దగ్గు, ఊపిరి ఆడకపోవడం, కొద్ది దూరం నడిచినా ఆయాసం, దగ్గుతో రక్తం పడటం లాంటి లక్షణాలు కనిపిస్తే వెంటనే వైద్య పరీక్షలు చేయించుకోవాలి. ప్రారంభ దశలోనే క్యాన్సర్‌ను గుర్తించి చికిత్స తీసుకుంటే ప్రాణాలు కాపాడవచ్చని తెలిపారు. మాటిమాటికి వచ్చే ఊపిరితిత్తుల ఇన్ఫెక్షన్లను సకాలంలో సరిగా చికిత్స చేయకపోతే భవిష్యత్తులో లంగ్ క్యాన్సర్ వచ్చే అవకాశం ఉందని హెచ్చరించారు.

స్మోకింగ్ మానేయడం వల్ల తమతో పాటు కుటుంబ సభ్యుల ఆరోగ్యాన్ని కాపాడవచ్చని డాక్టర్లు తెలిపారు.