మహంకాళి ఆలయంలో భక్తులకు మెరుగైన సదుపాయాలు: కమిషనర్ హనుమంతరావు

రాష్ట్ర దేవాదాయ శాఖ కమిషనర్ హనుమంతరావు మాట్లాడుతూ మహంకాళి అమ్మవారి దర్శనానికి వచ్చే భక్తులకు ఎటువంటి ఇబ్బంది లేకుండా చూడడానికి అన్ని ఏర్పాట్లు చేసినట్లు తెలిపారు. ఉదయం నుంచి భక్తుల తాకిడి పెరుగుతోందని, దానికి అనుగుణంగా సౌకర్యాలు కల్పిస్తున్నట్లు చెప్పారు.

భక్తుల నుంచి మంచి స్పందన వస్తోందని, ఎక్కడా ఒత్తిడి లేదా తోపులాట లేకుండా ప్రశాంతంగా దర్శనం జరుగుతోందని కమిషనర్ వివరించారు. పోలీసు బందోబస్తు సమర్థంగా ఉన్నట్లు, స్వచ్ఛందంగా పనిచేస్తున్న వాలంటీర్లు, దక్కన్ సేవా సమితి సభ్యులు మూడు షిఫ్టుల్లో సేవలు అందిస్తున్నట్లు తెలిపారు. దశాబ్దాలుగా దక్కన్ సేవా సమితి ఆలయంలో భక్తులకు సేవలు అందిస్తోందని పేర్కొన్నారు.

ముఖ్యమంత్రి ఆదేశాలు, మంత్రులు కొండా సురేఖ, పొన్నం ప్రభాకర్, ప్రిన్సిపల్ సెక్రటరీ శైలజా రామయ్యర్ సమక్షంలో ఆలయ కమిటీ సమీక్ష సమావేశాలు నిర్వహించినట్లు కమిషనర్ తెలిపారు. వైద్య ఆరోగ్య శాఖ ఆధ్వర్యంలో ఫస్ట్ ఎయిడ్ కిట్లు, అడ్వాన్స్డ్ లైఫ్ సపోర్ట్ అంబులెన్స్లు సిద్ధంగా ఉంచినట్లు చెప్పారు.

తాగునీటికి ఎటువంటి ఇబ్బంది లేకుండా అన్ని కౌంటర్లలో వాటర్ కిట్లు ఏర్పాటు చేసినట్లు వివరించారు. భక్తులు పెద్ద సంఖ్యలో మజ్జిగ ప్యాకెట్లు పంపిణీ చేయడంతోపాటు సంప్రదాయబద్ధంగా అన్నదానం జరుగుతోందని తెలిపారు. మొత్తం ఏర్పాట్లు ప్రణాళిక బద్ధంగా చేస్తున్నామని, భక్తులు సుఖంగా దర్శించుకునేలా చర్యలు తీసుకుంటున్నట్లు పేర్కొన్నారు.