సూపర్ మార్కెట్ నడుపుతూనే సర్పంచ్ బాధ్యతలు.. మహేశ్వరి ప్రయాణం

హనుమకొండ జిల్లా కమలాపురం మండలం దేశరాజుపల్లి గ్రామానికి చెందిన మిట్టపల్లి మహేశ్వరి గ్రామ సర్పంచ్‌గా బాధ్యతలు నిర్వహిస్తున్నారు. గత ఐదేళ్లుగా కమలాపురం మండల కేంద్రంలో సూపర్ మార్కెట్ నడుపుతున్నారు. గ్రామ పాలన, వ్యాపారం, కుటుంబ బాధ్యతలను ఆమె ఒకేసారి చూసుకుంటున్నారు.

స్థానిక సంస్థల ఎన్నికల్లో మహిళా రిజర్వేషన్ అవకాశం రావడంతో మహేశ్వరి సర్పంచ్ పదవికి పోటీ చేశారు. గ్రామస్తుల మద్దతుతో విజయం సాధించారు. తాను పుట్టిన ఊరు కావడంతో ప్రజలు ఆదరించి గెలిపించారని ఆమె తెలిపారు. గ్రామ అభివృద్ధి కోసం ఈ అవకాశాన్ని ఉపయోగించుకోవాలని నిర్ణయించుకున్నట్టు చెప్పారు.

పారిశుద్ధ్యం, తాగునీరు, రోడ్ల సమస్యలను ఆమె ప్రధాన ప్రాధాన్యతలుగా పేర్కొంటున్నారు. రోజూ ఉదయం గ్రామానికి చేరుకొని పారిశుద్ధ్య పనులు, డ్రైనేజీ, తాగునీటి సమస్యలను పరిశీలిస్తారు. గ్రామస్తుల సమస్యలు తెలుసుకుని వాటిని అధికారుల దృష్టికి తీసుకెళ్తున్నారు. ఈ పనుల్లో భర్త కూడా కలిసి సహకరిస్తున్నారని ఆమె తెలిపారు.

గ్రామ పనులు చూసుకున్న తర్వాత కమలాపురంలోని సూపర్ మార్కెట్‌కు చేరుకుంటారు. షాప్ తెరవడం నుంచి సరుకుల కొనుగోలు, కస్టమర్లకు సేవలు, రోజువారీ లెక్కలు ఆమె స్వయంగా చూసుకుంటారు. ఈ వ్యాపారమే కుటుంబానికి జీవనాధారం. ప్రజాసేవ కోసం వ్యాపారాన్ని వదులుకోకుండా రెండు బాధ్యతలను సమన్వయం చేసుకుంటున్నారు.

గ్రామంలో ఇంకా పలు పనులు చేపట్టాల్సి ఉందని మహేశ్వరి చెబుతున్నారు. కాంగ్రెస్ పార్టీ తరఫున మద్దతుతో మరిన్ని అభివృద్ధి పనులు తీసుకొస్తామని ఆమె తెలిపారు.