మాలీ: అక్రమ బంగారు రవాణాను నిరోధించేందుకు కొత్త ప్రభుత్వ సంస్థ

మాలీ ప్రభుత్వం తమ దేశం నుంచి అక్రమంగా వెలుపలకు వెళ్తున్న భారీ బంగారు స్మగ్లింగ్‌ను అరికట్టేందుకు 'మాలియన్ ఆఫీస్ ఆఫ్ ప్రెసిషియస్ సబ్‌స్టాన్సెస్' (OMASP) అనే కొత్త ప్రభుత్వ సంస్థను ఏర్పాటు చేసింది. ప్రతి సంవత్సరం ఎటువంటి అధికారిక ఎగుమతి రికార్డులు లేకుండా 30 నుంచి 57 టన్నుల బంగారం (దాదాపు 2 బిలియన్ నుంచి 3.5 బిలియన్ డాలర్ల విలువ) మాలీ నుంచి బయటకు వెళ్తున్నట్లు స్విస్ ఎన్జీఓ 'స్విస్ ఎయిడ్' 2024 నివేదికలో వెల్లడించింది. ఈ సంస్థ మాలీలోని చిన్న తరహా గనుల (ఆర్టిసానల్ మైనింగ్) రంగంపై ప్రత్యక్ష నియంత్రణ తీసుకుంటుంది, బంగారు వ్యాపారాన్ని అధికారిక సరఫరా గొలుసుల్లోకి తీసుకురావడంతో పాటు స్మగ్లింగ్‌పై కఠిన చర్యలు చేపడుతుంది. చిన్న తరహా మైనింగ్ దాదాపు 20 లక్షల మంది జీవనోపాధికి మూలంగా ఉంది, కానీ చాలా బంగారం అధికారిక ఆర్థిక వ్యవస్థకు దూరంగా ఉంటోంది. OMASP ఏర్పాటు మాలీ మైనింగ్ రంగంలో విస్తృత సంస్కరణల్లో భాగమని అధికారులు తెలిపారు. 2023లో కొత్త మైనింగ్ చట్టాన్ని ప్రవేశపెట్టినప్పటి నుంచి, ప్రభుత్వం మైనింగ్ పన్నులను పెంచింది, మైనింగ్ కంపెనీల్లో తన వాటాను విస్తరించింది, ఆడిట్‌ల ద్వారా సుమారు 1.2 బిలియన్ డాలర్ల నిధులు రికవరీ చేసింది. అదనంగా, రష్యా మద్దతుతో బమాకో సమీపంలో ఒక బంగారు రిఫైనరీ నిర్మాణాన్ని గతేడాది ప్రారంభించింది. ఈ రిఫైనరీ ద్వారా ముడి బంగారాన్ని ఎగుమతి చేయకుండా దేశంలోనే రిఫైన్ చేయాలని ప్రభుత్వం లక్ష్యంగా పెట్టుకుంది. మాలీ తదుపరి చర్య ఆఫ్రికాలో పెరుగుతున్న వనరుల జాతీయీకరణ ధోరణిని ప్రతిబింబిస్తోంది. అనేక ఆఫ్రికన్ దేశాలు వ్యూహాత్మక ఖనిజాలపై నియంత్రణను బిగిస్తూ, ముడి వనరులను ఎగుమతి చేయడానికి బదులుగా స్థానిక ప్రాసెసింగ్‌ను ప్రోత్సహిస్తున్నాయి. సొంత సహజ వనరుల నుంచి అత్యధిక విలువను పొందడమే లక్ష్యంగా పెట్టుకున్నాయి. మాలీ సంవత్సరాల తరబడి తన సరిహద్దులు దాటుతున్న బిలియన్ల డాలర్ల బంగారాన్ని చూస్తూ ఊరుకోవల్సి వచ్చింది. ఇప్పుడు ఆ సంపద తవ్విన చోటే నిలిచేలా చూడాలని ప్రయత్నిస్తోంది.