14 రాష్ట్రాల్లో పాక్ ISI స్లీపర్ సెల్స్‌పై దాడులు, 200 మందికి పైగా అరెస్ట్

దేశవ్యాప్తంగా పాకిస్థాన్ ISI స్లీపర్ సెల్స్‌పై కేంద్ర దర్యాప్తు సంస్థలు భారీ ఆపరేషన్ నిర్వహించాయి. 14 రాష్ట్రాల్లో దాదాపు ఒకేసారి జరిగిన దాడుల్లో 200 మందికి పైగా అనుమానిత ISI ఏజెంట్లు, వారికి సహకరించిన వారిని అదుపులోకి తీసుకున్నారు. కేంద్ర హోం మంత్రి అమిత్ షా ఈ విషయాన్ని వెల్లడించారు. స్వాతంత్ర్య దినోత్సవానికి ముందు పాకిస్థాన్ ISI మద్దతుగల షాజాద్ భట్టి టెర్రర్ నెట్‌వర్క్‌ను దెబ్బతీశామని, విధ్వంసక దాడుల ప్రణాళికలను భగ్నం చేశామని ఆయన తెలిపారు. దాడుల్లో ఇంప్రొవైజ్డ్ ఎక్స్‌ప్లోజివ్ డివైజ్లు, అంటే IED పరికరాలు, పాకిస్థాన్ ఆర్డినెన్స్ ఫ్యాక్టరీ గుర్తులున్న గ్రెనేడ్లు, భారీ మొత్తంలో ఆయుధాలు, మందుగుండు సామగ్రి స్వాధీనం చేసినట్లు హోం మంత్రిత్వ శాఖ తెలిపింది. సోదాలు ఇంకా కొనసాగుతున్నాయి. 500 మందికి పైగా అనుమానాస్పద ఫోన్ నంబర్లు, వ్యక్తులు నిఘా వర్గాల పరిశీలనలో ఉన్నారు. దర్యాప్తు సంస్థల వివరాల ప్రకారం, పలు స్లీపర్ సెల్స్‌లుగా విడిపోయిన ఈ నెట్‌వర్క్ సోషల్ మీడియా ద్వారా భారతీయులను రిక్రూట్ చేసుకుంది. సున్నిత ప్రాంతాల్లో ఏర్పాటు చేసిన CCTV కెమెరాలకు ఫోన్ నంబర్ చిప్‌ను అమర్చి, సైనిక బలగాల కదలికలు, మిలిటరీ రైళ్ల రాకపోకలకు సంబంధించిన రియల్ టైమ్ చిత్రాలను పాకిస్థాన్ హ్యాండ్లర్లకు పంపినట్లు గుర్తించారు. ఈ నెట్‌వర్క్ కేంద్రంలో పాకిస్థాన్ కేంద్రంగా పనిచేస్తున్న టెర్రర్ హ్యాండ్లర్ షాజాద్ భట్టి ఉన్నట్లు దర్యాప్తు సంస్థలు చెబుతున్నాయి. గ్రెనేడ్ దాడులు, IED పేలుళ్లు, టార్గెటెడ్ కిల్లింగ్స్, గూఢచర్యం వంటి కేసుల్లో ఇతని ప్రమేయం ఉన్నట్లు గుర్తించారు. పాకిస్థాన్ నుంచి ఆదేశాలు అందుకున్న స్లీపర్ సెల్స్ భారత గడ్డపై పెద్ద ఉగ్రదాడికి పాల్పడాలని చూసినట్లు నిఘా వర్గాలు తెలిపాయి. దేశవ్యాప్తంగా సోదాలు కొనసాగుతున్నాయి.