భార్య సీమంతం ముందు రోజు స్నేహితుడి దెబ్బతో వ్యక్తి మృతి

విశాఖపట్నం సంజీవయ్య కాలనీలో స్నేహితుడి దెబ్బకు గురై భోరా మణికంట అనే వ్యక్తి మృతి చెందాడు. ఈ ఘటన జరిగిన మరుసటి రోజు మణికంట భార్య సీమంతం వేడుక జరగాల్సి ఉంది.

పోలీసులు తెలిపిన వివరాల ప్రకారం, మణికంట, సురేంద్ర అలియాస్ కన్నా ఇద్దరూ ప్రాణ స్నేహితులు. శనివారం రాత్రి ఇద్దరి మధ్య చిన్న వివాదం చోటు చేసుకుంది. ఆగ్రహంతో సురేంద్ర మణికంట గుండెలపై బలంగా గుద్దాడు. దీంతో మణికంట అక్కడికక్కడే కుప్పకూలి చనిపోయాడు. సురేంద్ర మద్యం సేవించిన స్థితిలో ఉన్నాడని సమాచారం.

వీరిద్దరూ చిన్నప్పటి నుంచి స్నేహితులు. మణికంట ప్రస్తుతం ఊర్వశీ జంక్షన్ దగ్గర నివాసం ఉంటున్నారు. సీమంతం ఆహ్వానాల కోసం మణికంటతో సహా తల్లి పాత కాలనీకి వెళ్లారు. అదే సమయంలో సురేంద్రతో గొడవ జరిగింది.

కంచరపాలెం పోలీసులు సురేంద్రను అదుపులోకి తీసుకుని విచారిస్తున్నారు. ఉద్దేశపూర్వకంగా చంపలేదని, అయితే దెబ్బ బలంగా తగలడంతో మరణం సంభవించిందని ప్రాథమిక విచారణలో తేలింది. 'శుభకార్యానికి వచ్చి నా కుమారుడి శవాన్ని చూస్తానని ఊహించలేదు' అని తల్లి కన్నీటి పర్యంతమయ్యారు. పోలీసులు కేసు నమోదు చేసి దర్యాప్తు కొనసాగిస్తున్నారు.