మానేరు నదిలో ఇసుక తవ్వకాలు రాత్రింబవళ్లు కొనసాగుతున్నాయని ఆరోపణలు

కరీంనగర్ జిల్లాలో మానేరు నదిలో ఇసుక తవ్వకాలు రాత్రింబవళ్లు కొనసాగుతున్నాయని స్థానికులు ఆరోపిస్తున్నారు. మానకొండూరు నియోజకవర్గంలోని ఊటూరు, హుజూరాబాద్ నియోజకవర్గంలోని కోర్కల్, మల్లారెడ్డిపల్లి, కొండపాక ప్రాంతాల్లో ఇసుక క్వారీలు నడుస్తున్నాయి.

ఇసుక అక్రమ రవాణాను అడ్డుకోవడానికి, ప్రభుత్వానికి ఆదాయం చేకూర్చడానికి TGMDC కార్పొరేషన్‌ను ఏర్పాటు చేశారు. కేంద్ర మార్గదర్శకాల ప్రకారం క్వారీల్లో ఉదయం 6 నుంచి సాయంత్రం 7 గంటల వరకే తవ్వకాలు చేపట్టాలి. కానీ TGMDC 2015లో ఒక సర్క్యులర్ జారీ చేసింది. రాత్రి 9 గంటల వరకు, తర్వాత రాత్రి 11 గంటల వరకు లోడింగ్ పనులు చేసుకోవచ్చని అందులో పేర్కొంది. ఈ సర్క్యులర్‌ను ఆధారంగా చేసుకుని 24 గంటలు ఇసుక తరలింపు జరుగుతోందని స్థానికులు చెప్తున్నారు.

మానేరు నదిలో తవ్వకాలను నిలిపివేయాలంటూ పరివాహక ప్రాంతవాసులు National Green Tribunal (NGT) ను ఆశ్రయించారు. తవ్వకాలను వెంటనే ఆపాలని, ఉన్న స్టాక్‌ను అమ్ముకోవాలని NGT ఆదేశించింది. ఆ ఆదేశంపై కొందరు సుప్రీంకోర్టును ఆశ్రయించారు. దీంతో NGT ఆదేశంపై సుప్రీంకోర్టు స్టే విధించింది.

పెద్దపల్లి నియోజకవర్గ పరిధిలోని మానేరులో ఇసుక తవ్వకాలు చేపట్టవద్దని ఎమ్మెల్యే విజయరమణరావు ఆదేశించారు. అయితే మానకొండూరు నియోజకవర్గ పరిధిలోని క్వారీల్లో తవ్వకాలు కొనసాగుతున్నాయని స్థానికులు ఆరోపిస్తున్నారు. ఈ తవ్వకాలను ఎమ్మెల్యే కవ్వంపల్లి సత్యనారాయణ ఆపడం లేదని పరివాహక గ్రామాల ప్రజలు ఆగ్రహం వ్యక్తం చేస్తున్నారు. అనుమతి లేకుండా కొన్ని ఇసుక లారీలు లోడ్ చేసుకుని వెళ్తున్నాయని కూడా ఆరోపణలు ఉన్నాయి. TGMDC అధికారులు మాత్రం నిబంధనల ప్రకారమే ఇసుక తీస్తున్నామని చెప్తున్నారు.

ఊటూరు గ్రామంలో భూగర్భ జలాలు అడుగంటిపోతున్నాయని, పొలాలు ఇసుకతో నిండిపోయాయని గ్రామస్తులు చెప్తున్నారు. ఇసుక లారీలతో రోడ్లు దెబ్బతిన్నాయని, ఊటూరు, పచ్చూరు మధ్య ఉన్న ఒకే రోడ్డుపై బస్సులు కూడా రావడం లేదని వారు చెప్తున్నారు. తాగునీటికి, పంటలకు ఇబ్బంది అవుతోందని రైతులు ఆందోళన వ్యక్తం చేస్తున్నారు.

ఇసుకను minor mineral గా పరిగణిస్తూ MMDR Act 1957 ప్రకారం రాష్ట్ర ప్రభుత్వాలు నిబంధనలు అమలు చేస్తాయి. లక్ష క్యూబిక్ మీటర్లకు పైగా తవ్వకాలకు కేంద్ర పర్యావరణ అనుమతులు అవసరం. ఇక్కడి క్వారీల్లో 5 లక్షల క్యూబిక్ మీటర్లకు పైగా తవ్వకాలకు అనుమతులు ఇచ్చినట్లు తెలుస్తోంది. సుప్రీంకోర్టు స్టే కొనసాగుతున్నందున, కేసు పరిష్కారం అయ్యే వరకు తవ్వకాలు కొనసాగుతున్నాయి.