మంచిర్యాలలో ప్రభుత్వ నిర్ణీత ధరలకే బియ్యం అమ్మకం: కలెక్టర్ కుమార్ దీపక్

మంచిర్యాల జిల్లాలో బియ్యం ధరలను నియంత్రించేందుకు జిల్లా యంత్రాంగం చర్యలు చేపట్టింది. చెన్నూరు మండలంలో ప్రత్యేక బియ్యం అమ్మకం కేంద్రాలు ప్రారంభమయ్యాయి.

ఎల్ నినో ప్రభావంతో వరి ఉత్పత్తి తగ్గుతుందని జిల్లా కలెక్టర్ కుమార్ దీపక్ తెలిపారు. దీనివల్ల మార్కెట్లో ధరలు ముందుగానే పెరిగే అవకాశం ఉందన్నారు. బియ్యం కొరత రాకుండా, ధరలు పెరగకుండా ముందస్తు చర్యలు తీసుకుంటున్నట్లు ఆయన చెప్పారు.

బహిరంగ మార్కెట్లో అధిక ధరలకు అడ్డుకట్ట వేయాలని ప్రభుత్వం భావిస్తోంది. ప్రభుత్వం నిర్ణయించిన ధరలకే నాణ్యమైన బియ్యం సామాన్య ప్రజలకు అందించడం లక్ష్యమని కలెక్టర్ అన్నారు. ప్రతి కుటుంబానికి అవసరమైన మోతాదులో బియ్యం నిరంతరం అందుబాటులో ఉండేలా పౌర సరఫరాల శాఖ పర్యవేక్షిస్తుందని తెలిపారు.

బియ్యాన్ని బ్లాక్ మార్కెట్‌కు తరలిస్తే కఠిన చర్యలు తప్పవని వ్యాపారులను ఆయన హెచ్చరించారు.

భీమారం మండలంలో ఒక బియ్యం అమ్మకం కేంద్రం, చెన్నూరు మండలంలో రెండు కేంద్రాలు ప్రారంభమయ్యాయి. స్థానిక వ్యాపారులు, రైస్ మిల్లర్ల సహకారంతో ఈ కేంద్రాలు ఏర్పాటు చేశారు. ప్రభుత్వం విడుదల చేసిన రేట్ చార్ట్ కంటే తక్కువ ధరకే బియ్యం అమ్ముతున్నట్లు రైస్ మిల్లర్స్ అసోసియేషన్, స్థానిక వ్యాపారులు తెలిపారు.