మీనరాశి వార ఫలాలు: శుక్రుడి స్థాన మార్పుతో కుటుంబ చిక్కులు, ఖర్చుల పెరుగుదల

మీనరాశి వారికి ఈ వారం కొన్ని గ్రహాల అనుకూలత ఉంది. జ్యోతిష్య విశ్లేషణ ప్రకారం గురువు పంచమ స్థానంలో శుభుడిగా ఉన్నారు. శుక్రుడు అష్టమ స్థానంలో, కేతువు షష్ఠమ స్థానంలో శుభ ఫలితాలు ఇస్తున్నారు.

శుక్రుడు ఈ నెల 6వ తేదీ నుంచి సప్తమ స్థానంలోకి రానున్నారు. దీని ప్రభావంతో ఇంట్లో కుటుంబపరమైన చిక్కులు రావచ్చు. భార్యాభర్తల మధ్య మాటల్లో తేడాలు వచ్చే అవకాశం ఉంది. అయితే మీరు అనుకున్న పనులను చక్కగా నిర్వర్తిస్తారు.

భూసంబంధమైన పరిష్కారాలు వస్తాయి. పాత చట్టపరమైన చిక్కులను తొలగించేందుకు ప్రయత్నించాలి. ప్రయత్నిస్తే అవి తప్పకుండా తొలగిపోతాయి. ఖర్చులు మాత్రం అధికమవుతాయి. భూసంబంధ వివాదాలకు కొంత దూరంగా ఉండడం మంచిది. సంతకాలు, జామీన్లు ఇవ్వకపోవడం శ్రేయస్కరం.

ఏలినాడు శని అంటే సాడే సాతి ఉన్నందున చిన్న చిన్న బాధలు ఉండొచ్చు. దైవానుగ్రహం కోసం ఎక్కువగా పూజించాలి. విదేశాల్లో ఉన్నవారికి, ఉద్యోగ అన్వేషణలో ఉన్నవారికి ఇబ్బందికరమైన పరిస్థితులు ఎదురుకావచ్చు. స్వదేశం రావాలని ప్రయత్నించేవారికి ఈ వారం ఫలితం కోసం ఎదురుచూపు ఉంటుంది. ఆకస్మిక ప్రమాదాల నుంచి కొంత దూరంగా ఉండాలి.

అనారోగ్య బాధ నుంచి విముక్తి లభిస్తుంది. చిన్న చిన్న వైద్య సేవలు మాత్రం అవసరమవుతాయి. ఎదురుచూస్తున్న పని పూర్తవుతుంది. భూ సమస్యలు తొలగిపోవడంతో మనసు సంతోషంగా ఉంటుంది. మంగళ, బుధ, గురువారాలు అనుకూలంగా ఉంటాయి. ఆ రోజుల్లో సంతోషకరమైన ఫలితాలు వస్తాయి. ఇష్టదైవాన్ని ప్రార్థించాలి. వెంకటేశ్వర స్వామిని ఆరాధిస్తే ఉపశమనం లభిస్తుంది.