మియాపూర్ భూముల వ్యవహారం: CM రేవంత్ సంచలన ఆదేశాలు

హైదరాబాద్ మియాపూర్లో సర్వే నెంబర్ 100, 101లో ఉన్న 550 ఎకరాల భూముల వ్యవహారంలో CM రేవంత్ రెడ్డి సంచలన ఆదేశాలు జారీ చేశారు. సుప్రీం కోర్టు తీర్పు అనుకూలంగా వచ్చిన నేపథ్యంలో ఈ భూములను తక్షణమే స్వాధీనం చేసుకోవాలని రెవెన్యూ అధికారులకు, HMDA అధికారులకు ఆదేశాలు ఇచ్చారు.

సుప్రీం కోర్టు తీర్పులో పారా నెంబర్ 44లో తెలంగాణ ప్రభుత్వానికి చెందిన భూములను కాజేయడానికి కబ్జాదారులు ప్రయత్నించారని స్పష్టంగా పేర్కొన్నారు. పారా నెంబర్ 51లో రెవెన్యూ రికార్డులలో నమోదైన వివరాలు బోగస్ అని, రెవెన్యూ అధికారులతో కుమ్ముకొని మోసం జరిగిందని తేల్చి చెప్పారు. పారా నెంబర్ 58లో ఇది ఫ్రాడ్ అని, రాష్ట్ర ప్రభుత్వ యాజమాన్య హక్కులు స్పష్టంగా రుజువయ్యాయని సుప్రీం కోర్టు స్పష్టం చేసింది.

దాదాపు 50 వేల కోట్ల రూపాయల విలువైన ఈ భూములను కాపాడినట్లు CM రేవంత్ రెడ్డి ప్రకటించారు. సర్వే చేసి సరిహద్దులు నిర్ణయించి కంచె వేయాలని అధికారులను ఆదేశించారు. ఈ భూముల ద్వారా వచ్చే నిధులను దళితులు, గిరిజనులు, ఆదివాసులు, నిరుపేదల విద్య కోసం, ఇందిరమ్మ ఇళ్ళ కోసం, సాగునీటి ప్రాజెక్టుల పూర్తికి వినియోగించాలని నిర్ణయించారు.

గత KCR ప్రభుత్వం కబ్జాదారులకు అనుకూలంగా వ్యవహరించి సుప్రీం కోర్టులో వాయిదాలు వేస్తూ ప్రభుత్వ వాదనలు వినిపించలేదని CM రేవంత్ ఆరోపించారు. తమ ప్రభుత్వం మూడు సంవత్సరాలు న్యాయవాదులతో నిరంతరం సమీక్ష చేస్తూ బలమైన వాదనలు వినిపించడం ద్వారా ఈ భూములను కాపాడగలిగినట్లు తెలిపారు. దీనికి సంబంధించి కూలంకషంగా క్యాబినెట్ లో చర్చించి రిసోర్స్ మొబిలైజేషన్ క్యాబినెట్ సబ్ కమిటీకి నివేదిక అందించాలని ఆదేశించారు.