AI బబుల్‌పై మైకెల్ బర్రీ షార్ట్ బెట్టింగ్ – టెస్లా, క్యాటర్‌పిల్లర్‌లపై హెచ్చరిక

అమెరికన్ ఇన్వెస్టర్ మైకెల్ బర్రీ ప్రస్తుత AI ఉత్సాహంపై తీవ్ర ఆందోళన వ్యక్తం చేశారు. ‘ది బిగ్ షార్ట్’ ఫేమ్ గా ప్రసిద్ధి చెందిన బర్రీ, టెస్లా, క్యాటర్‌పిల్లర్, అప్లైడ్ మెటీరియల్స్ వంటి AI-అనుసంధానిత కంపెనీల షేర్లపై షార్ట్ పొజిషన్లు తీసుకున్నట్లు నివేదికలు సూచిస్తున్నాయి. ఈ స్టాక్‌ల విలువ తగ్గుతుందని ఆయన పందెం వేశారు. AI రంగంలో కంపెనీలు భారీగా పెట్టుబడులు పెడుతున్నాయని, అయితే ఆ పెట్టుబడులకు తగిన లాభాలు రావడం లేదన్నది బర్రీ ఆందోళన. ‘వెనకబడిపోతామన్న’ భయంతోనే కంపెనీలు అత్యంత భారీ మొత్తాలు ఖర్చు చేస్తున్నాయని ఆయన అభిప్రాయపడ్డారు.

AI రంగంలో ప్రస్తుతం కనిపిస్తున్న అతి ఉత్సాహం 1990ల చివరి నాటి డాట్‌కామ్ బబుల్‌ లాగా మారే ప్రమాదం ఉందని పలువురు విశ్లేషకులు హెచ్చరిస్తున్నారు. బర్రీ గతంలో 2008 సబ్‌ప్రైమ్ మార్కెట్ సంక్షోభాన్ని ముందే గుర్తించి ప్రపంచ దృష్టిని ఆకర్షించారు. ప్రస్తుతం ఆయన చేస్తున్న ఈ షార్ట్ బెట్టింగ్‌పై మార్కెట్ విశ్లేషకులు ఆసక్తిగా గమనిస్తున్నారు.

మార్కెట్‌లో ఏదైనా పెద్ద కుదుపు వచ్చే ముందు ఎవరూ హెచ్చరించరని, 2008 ఆర్థిక సంక్షోభం కూడా ఎటువంటి ముందస్తు ప్రకటన లేకుండానే వచ్చిందని నిపుణులు గుర్తు చేస్తున్నారు. ‘AI బబుల్ ఎప్పుడు పగిలిపోతుందో ఎవరికీ తెలియదు’ అని బర్రీ వ్యాఖ్యానించినట్లు సమాచారం.

భారతీయ మార్కెట్లు కూడా అమెరికన్ మార్కెట్‌లతో ముడిపడి ఉండడం వల్ల ప్రపంచ వ్యాప్తంగా పెట్టుబడిదారులు అప్రమత్తంగా ఉండాలని ఈ హెచ్చరిక సంకేతం ఇస్తోంది.