ఖమ్మం జిల్లాలో అర్ధరాత్రి ఆలయ ప్రాంగణంలో గుప్తనిధుల తవ్వకాలు; 11 మంది అరెస్ట్

ఖమ్మం జిల్లా బేమసూరు మండలం కుంచపర్తిలో మారమ్మ అమ్మవారి ఆలయం, శివాలయాల వెనుక అర్ధరాత్రి గుప్తనిధుల కోసం జరిగిన తవ్వకాల్లో 11 మందిని పోలీసులు అరెస్టు చేశారు.

ఆలయ ప్రాంగణంలో డ్రిల్లింగ్ మిషన్లు ఉపయోగించి భారీ గోతులు తవ్వుతున్న వీరిని పోలీసులు రెడ్‌హ్యాండెడ్‌గా పట్టుకున్నారు.

విచారణలో తవ్వకాల వెనుక ఆలయ పూజారి హస్తం ఉన్నట్టు తేలిందని పోలీసులు తెలిపారు. నిందితులు ఇచ్చిన వివరాల ప్రకారం, గుంటూరు ఎనుకూరు నుంచి వారిని రప్పించిన పూజారి గుప్తనిధుల కోసం బావిలాగా తవ్వాలని ఆదేశించాడు.

మధ్యలో బండరాయి పడటంతో పని ఆపేందుకు ప్రయత్నించగా, పూజారి మంత్ర తంత్రాల పేరుతో వారిని బెదిరించి బలవంతంగా పని చేయించినట్లు నిందితులు చెప్పారు.

పూజారితో పాటు అతని మేనల్లుడు ప్రధాన సూత్రధారులుగా ఉన్నట్లు పోలీసులు గుర్తించారు. అరెస్టు చేసిన 11 మంది నుంచి 11 సెల్‌ఫోన్లు, ఆరు బైక్‌లు స్వాధీనం చేసుకున్నారు.

ఈ వ్యవహారంలో మరెవరు ప్రమేయం ఉన్నారనే కోణంలో దర్యాప్తు కొనసాగుతోంది.