లాల్ దర్వాజా బోనాల సందర్భంగా మంత్రి కొండా సురేఖ ప్రసంగం

లాల్ దర్వాజా సింహవాహిని మహంకాలి అమ్మవారి బోనాల ఉత్సవంలో మంత్రి కొండా సురేఖ పాల్గొన్నారు. ఈ సందర్భంగా ఆమె భక్తులను ఉద్దేశించి ప్రసంగించారు.

ఆమె మాట్లాడుతూ, లాల్ దర్వాజా బోనాలకు వందేళ్ల చరిత్ర ఉందని, సైనికులకు ప్లేగు, కలరా వ్యాధులు వచ్చినప్పుడు వారు ఉజ్జైనిలోని మహంకాలిని పూజించి, తమకు ఆరోగ్యం లభిస్తే హైదరాబాద్‌లో బోనాలు సమర్పిస్తామని మొక్కుకున్నారని, అప్పటి నుంచి ఈ పండుగ కొనసాగుతోందని చెప్పారు.

బోనాల పండుగలో మహిళలు ఉదయాన్నే స్నానం చేసి, పొద్దునే బోనం వండి అమ్మవారికి సమర్పించి, సమాజం, రైతులు, పశువుల క్షేమం కోసం మొక్కులు చెల్లిస్తారని ఆమె తెలిపారు. అలాగే ప్రభుత్వం తరపున ముఖ్యమంత్రి రూ.20 కోట్లు బడ్జెట్‌లో కేటాయించారని, మరో రూ.20 కోట్లు ఎస్డీఎఫ్ నిధుల నుంచి అలంకరణ, సౌకర్యాల కోసం ఇచ్చారని పేర్కొన్నారు.

భక్తుల సౌకర్యాల కోసం వికలాంగులు, గర్భిణులు, పిల్లల తల్లులు, వృద్ధులు, జోగినీలకు ప్రత్యేక క్యూలైన్లు ఏర్పాటు చేశామని, మంచి నీటి సౌకర్యం కల్పించి వాలంటీర్లు భక్తులను ముందుకు తీసుకెళ్తున్నారని చెప్పారు. ఆషాడ మాసం ముగిసి శ్రావణ మాసం ప్రారంభమైన తర్వాత కూడా దేవాదాయ శాఖ ద్వారా పెద్ద ఎత్తున కార్యక్రమాలు నిర్వహిస్తామని ఆమె ప్రకటించారు.