ఎల్నీనో ప్రభావంపై మంత్రి తుమ్మల నాగేశ్వరరావు ఉన్నతస్థాయి సమీక్ష

మంత్రి తుమ్మల నాగేశ్వరరావు ఎల్నీనో ప్రభావం వల్ల ఏర్పడే వర్షాభావ పరిస్థితులపై ఇవాళ ఐక్రిసాట్‌లో ఉన్నత స్థాయి సమీక్ష నిర్వహించారు. ఈ సమావేశంలో వ్యవసాయ, ఉద్యానవన, భూగర్భ జలశాఖ ఉన్నతాధికారులు, శాస్త్రవేత్తలు పాల్గొన్నారు.

ఎల్నినో పరిస్థితులను దృష్టిలో ఉంచుకుని ప్రభుత్వం మూడు దశల ఆకస్మిక ప్రణాళికలను సిద్ధం చేసింది. ఈ నెల 15 నుంచి తొలి దశ ప్రణాళిక అమలు చేయాలని మంత్రి అధికారులకు సూచించారు. వర్షాభావం కొనసాగితే వరి సాగు 30 నుంచి 40 లక్షల ఎకరాలకే పరిమితమయ్యే అవకాశం ఉందని ప్రభుత్వం భావిస్తోంది. అందుకే ప్రత్యామ్నాయ పంటల సాగు కోసం 50 లక్షల ఎకరాలకు ప్రణాళికలు సిద్ధం చేసింది.

రాష్ట్రంలో 20 జిల్లాల్లో వర్షపాతం లోటు నమోదైంది. జిల్లాల వారీగా ప్రత్యేక కార్యాచరణ అమలు చేస్తున్నారు. నేలలో తేమ వచ్చే వరకు విత్తనాలు వేయవద్దని అధికారులు రైతులకు సూచిస్తున్నారు. వర్షాలు ఆలస్యమైతే పప్పు ధాన్యాలు, చిరుధాన్యాలు, నూనె గింజలు వంటి పంటలు వేయాలని సూచించారు.

విత్తనాలు, ఎరువులకు ఎలాంటి కొరత లేదని, ముందస్తు నిల్వలు సిద్ధంగా ఉన్నాయని అధికారులు తెలిపారు. తొలిదశ ప్రణాళిక ఈ నెల 15 నుంచి అమలులోకి రానుంది.