విజయవాడలో మూడో ప్రపంచ తెలుగు రచయితల మహాసభలు ముగింపు

విజయవాడ కేబీఎన్ కళాశాలలో రెండు రోజుల పాటు జరిగిన మూడో ప్రపంచ తెలుగు రచయితల మహాసభలు ముగిసాయి. మండలి వెంకట కృష్ణారావు శత జయంతి ఉత్సవాల్లో భాగంగా నిర్వహించిన ఈ సదస్సుకు 600 మందికి పైగా రచయితలు హాజరయ్యారు.

ముగింపు సభకు ఏపీ మహిళా కమిషన్ చైర్పర్సన్ రాయిపాటి శైలజ, శ్రీకాకుళం అంబేద్కర్ యూనివర్సిటీ వీసీ కేఆర్ రజిని, రాష్ట్ర సృజనాత్మకత సంస్కృతి సమితి చైర్పర్సన్ తేజస్వి పొడపాటి, ఎమ్మెల్యే మండలి బుద్ధ ప్రసాద్ ప్రధాన అతిథులుగా హాజరయ్యారు.

మహాసభల్లో మహిళల అభ్యున్నతి, భద్రత, గౌరవం కోసం 10 తీర్మానాలను ఏకగ్రీవంగా ఆమోదించారు. మహిళలపై అనుచిత ప్రవర్తన, మాటల విషయంలో ప్రజా ప్రతినిధులను అనర్హులుగా ప్రకటించే చట్టం, సోషల్ మీడియాలో అనుచిత పోస్టులపై కఠిన శిక్షలు విధించే చట్టం తీసుకురావాలని తీర్మానించారు. ఈ తీర్మానాలను కేంద్ర, రాష్ట్ర ప్రభుత్వాల దృష్టికి తీసుకెళ్తామని ఎమ్మెల్యే బుద్ధ ప్రసాద్ తెలిపారు.

రాష్ట్ర సృజనాత్మకత సంస్కృతి సమితి చైర్పర్సన్ తేజస్వి పొడపాటి మాట్లాడుతూ, రచయితలకు రాష్ట్ర ప్రభుత్వం తరఫున గౌరవం కల్పిస్తామని హామీ ఇచ్చారు. అమరావతి తెలుగు మహోత్సవం పేరుతో ఒక కార్యక్రమాన్ని ఆంధ్రప్రదేశ్ కల్చర్ కమీషన్ రూపొందించిందని, ఇది రచయితలకు వేదికగా ఉంటుందని వివరించారు.

తెలుగు భాష సంరక్షణ, యువ రచయితల ప్రోత్సాహంపై చర్చలు జరిగాయి. సాహిత్యం ద్వారా సామాజిక మార్పు సాధ్యమనే సందేశాన్ని సదస్సు ఇచ్చింది.