రంగారెడ్డి ఘాతుకం: విడాకులు అడిగిన భార్య, ఇద్దరు పిల్లలు, మైనర్ బాలిక హత్య

రంగారెడ్డి జిల్లాలో రాజ్కుమార్ అనే వ్యక్తి తన భార్య, ఇద్దరు చిన్నారులు, మరో మైనర్ బాలికను హత్య చేసిన సంఘటన వెలుగులోకి వచ్చింది. విడాకులు అడగడంతోనే ఈ ఘాతుకం జరిగినట్లు పోలీసులు భావిస్తున్నారు.

పోలీసులు, గ్రామస్తులు తెలిపిన వివరాల ప్రకారం.. రాజ్కుమార్ డ్రైవర్‌గా పనిచేస్తూ బెట్టింగ్ వంటి వ్యసనాలకు బానిసై పెద్ద మొత్తంలో అప్పులు చేశాడు. గతంలో ఆత్మహత్యాయత్నం కూడా చేశాడు. తన ట్యూషన్ టీచర్ అయిన సరితను 2018లో బలవంతంగా వివాహం చేసుకున్నాడు. వీరికి ఇద్దరు చిన్నారులు ఉన్నారు. ఇటీవల రాజ్కుమార్‌పై మైనర్ బాలిక లైంగిక వేధింపుల కేసు నమోదైంది.

ఈ నేపథ్యంలో భార్య సరిత విడాకులు అడగడంతో ఆమెను, పిల్లలను చంపాలని నిర్ణయించుకున్నాడు. ముందుగా మైనర్ బాలికను చెరువు దగ్గరకు తీసుకెళ్లి హత్య చేశాడు. అనంతరం ఇంటికి వచ్చి నిద్రిస్తున్న భార్య, ఇద్దరు పిల్లలను కత్తితో పొడిచి చంపాడు. కొద్దిసేపటికే గ్రామస్తులు ఘటనను గమనించి పోలీసులకు సమాచారం ఇచ్చారు.

రాజ్కుమార్ ప్రస్తుతం పోలీసుల అదుపులో ఉన్నట్లు సమాచారం. అయితే అధికారికంగా అరెస్టును పోలీసులు ధృవీకరించలేదు. ఘటనపై కేసు నమోదు చేసి దర్యాప్తు కొనసాగిస్తున్నారు.

స్థానిక సర్పంచ్ మాట్లాడుతూ.. ‘నిందితుడిపై కఠిన చర్యలు తీసుకోవాలి. దిశ ఎన్కౌంటర్ లాగా ఈ కేసులోనూ చర్యలు ఉండాలి’ అని డిమాండ్ చేశారు. నిందితుడు గతంలోనూ పలు నేరాలకు పాల్పడ్డాడని, అతడిని గ్రామం నుంచి పంపించాలని పలుమార్లు కోరినా పట్టించుకోలేదని గ్రామస్తులు ఆగ్రహం వ్యక్తం చేస్తున్నారు.