జపాన్‌లో 'ధురంధర్'కు తొలి రోజు తక్కువ ఆదరణ, 900 మంది కూడా చూడలేదు

జూలై 10న జపాన్‌లో విడుదలైన బాలీవుడ్ చిత్రం 'ధురంధర్'కు తొలి రోజు తక్కువ స్పందన లభించింది. దేశవ్యాప్తంగా 80 స్క్రీన్లలో ప్రదర్శితమైన ఈ సినిమాను మొదటి రోజు 900 మంది కూడా వీక్షించలేదని బాక్సాఫీస్ వర్గాలు తెలిపాయి.

ఇటీవల కాలంలో భారతీయ సినిమాలకు జపాన్ కీలక మార్కెట్‌గా మారింది. RRR, బాహుబలి, కల్కి వంటి తెలుగు సినిమాలు అక్కడ భారీ విజయాలు సాధించాయి. 1990లలో రజనీకాంత్ నటించిన 'ముత్తు' చిత్రం నెలకొల్పిన అనేక రికార్డులను RRR తుడిచిపెట్టింది. అయితే, హిందీ సినిమాలకు మాత్రం జపాన్ ప్రేక్షకుల నుంచి ఇప్పటికీ ఆదరణ తక్కువగానే ఉంది. 'బజరంగీ భాయిజాన్', 'లంచ్ బాక్స్' వంటి చిత్రాలకు కూడా పెద్దగా విజయం దక్కలేదు.

'ధురంధర్' విడుదలకు ముందు జపాన్‌లో ప్రత్యేక ప్రమోషనల్ కార్యక్రమాలు నిర్వహించలేదు. తారక్, చరణ్, ప్రభాస్ వంటి నటులు తమ సినిమాల ప్రమోషన్స్‌లో భాగంగా జపాన్ పర్యటనలు చేస్తుండటంతో తెలుగు చిత్రాలకు మెరుగైన స్పందన లభిస్తోంది. 'ధురంధర్' విషయంలో ఈ వ్యూహం లేకపోవడం ప్రభావం చూపిందని పరిశీలకులు భావిస్తున్నారు.