షాబాద్ హత్య కేసు నిందితుడు రాజ్కుమార్పై పోక్సో కేసు ముందస్తు బెయిల్ వివరాలు వెల్లడి

షాబాద్‌లో ఆరుగురి హత్య కేసులో నిందితుడిగా ఉన్న రాజ్కుమార్పై గతంలో నమోదైన పోక్సో కేసు ముందస్తు బెయిల్ ఆర్డర్ కాపీలో వివరాలు వెలుగులోకి వచ్చాయి. ఈ కేసులో రాజ్కుమార్ ఇటీవలే ముందస్తు బెయిల్ పొందాడు.

బాధితురాలు, ఓ మైనర్ బాలిక ఇచ్చిన ఫిర్యాదు ప్రకారం, నిందితుడు గత ఏడాది కాలంగా తనను వేధిస్తున్నాడు. వివాహితుడైనప్పటికీ బాలికతో ప్రేమగా మాట్లాడాలని ఒత్తిడి చేసేవాడు. కాలేజీకి వెళ్లే సమయంలో అడ్డుకుని, మాట్లాడకపోతే చంపేస్తానని బెదిరించేవాడని ఆరోపించింది. బాధితురాలి ఇంటివైపు సీసీటీవీ కెమెరాలు ఏర్పాటు చేసి కుటుంబాన్ని గమనించాడని, మే 16న ఇంటర్మీడియట్ పరీక్ష అనంతరం బాలిక చేయి పట్టుకుని బలవంతంగా తీసుకెళ్లేందుకు ప్రయత్నించి, అడ్డుకున్న కుటుంబ సభ్యులను బెదిరించాడని ఫిర్యాదులో పేర్కొన్నారు.

నిందితుడు రాజ్కుమార్ మాత్రం ఈ ఆరోపణలన్నింటినీ ఖండించాడు. బాలిక చేయి పట్టుకోలేదని, ఆ రోజు తన భార్యతో కలిసి ఆసుపత్రిలో ఉన్నానని చెప్పాడు. తాను బాధితురాలి తండ్రికి అప్పు ఇచ్చానని, ఆ అప్పు తిరిగి చెల్లించకుండా ఉండేందుకే ఈ కేసు పెట్టించారని వాదించాడు.

ఇరువర్గాల వాదనలు విన్న ప్రత్యేక న్యాయస్థానం, బాధితురాలి వాంగ్మూలం నమోదైందని, దర్యాప్తులో కీలక భాగం పూర్తయిందని గమనించింది. ప్రస్తుతం నిందితుడిని కస్టడీలో విచారించాల్సిన అవసరం లేదని అభిప్రాయపడి, రూ.20 వేల వ్యక్తిగత బాండ్, ఇద్దరు షూరిటీలతో ముందస్తు బెయిల్ మంజూరు చేసింది.

ఇదిలా ఉండగా, ఈ పోక్సో కేసు దర్యాప్తు సమయంలో షాబాద్ పోలీస్‌స్టేషన్ ఎస్ఐ రమేశ్ నిందితుడి నుంచి డబ్బు తీసుకున్నారన్న ఆరోపణలు రావడంతో ఆయన్ను సస్పెండ్ చేశారు. సీఐ కాంతారెడ్డికి చార్జ్ మెమో జారీ చేసి విధుల నుంచి తప్పించారు. ఈ ఆరోపణలపై డిపార్ట్‌మెంటల్ విచారణ కొనసాగుతోంది.

మరోవైపు, ఆరుగురు హత్యల కేసులో రాజ్కుమార్ కోసం పోలీసులు విస్తృతంగా గాలిస్తున్నారు. ఈ నేపథ్యంలో సూర్యాపేటలో అతని పోలికలున్న వ్యక్తి కనిపించడంతో రాజ్కుమార్ దొరికాడన్న పుకార్లు వచ్చాయి. అయితే, ఆ వ్యక్తి రాజ్కుమార్ కాదని పోలీసులు నిర్ధారించారు. నిందితుడు ఇంకా పరారీలోనే ఉన్నాడు.