తెలంగాణ ప్రాజెక్టుల్లో నీటి నిల్వలు 13%కు పడిపోయాయి: CWC నివేదిక

తెలంగాణలోని ఎనిమిది ప్రధాన ఇరిగేషన్ ప్రాజెక్టుల్లో నీటి నిల్వలు గణనీయంగా తగ్గాయి. సెంట్రల్ వాటర్ కమిషన్ (CWC) నివేదిక ప్రకారం, ఈ ప్రాజెక్టుల మొత్తం లైవ్ స్టోరేజ్ కేవలం 13% మాత్రమే మిగిలి ఉంది. దేశంలో తక్కువ నీటి నిల్వలున్న రాష్ట్రాల్లో తెలంగాణ మొదటి స్థానంలో నిలిచింది.

CWC ఈ ఎనిమిది ప్రాజెక్టుల్ని రెసర్వాయర్ స్టోరేజ్ మానిటరింగ్ సిస్టమ్ (RSMS) ద్వారా పర్యవేక్షిస్తోంది. వీటి మొత్తం లైవ్ స్టోరేజ్ కెపాసిటీ 355 టీఎంసీలు కాగా, ప్రస్తుతం 44.53 టీఎంసీల నీరు మాత్రమే నిల్వ ఉంది. గత వారం 48 టీఎంసీలు ఉండగా, 3 టీఎంసీల నీరు తగ్గినట్లు CWC తెలిపింది. గత ఏడాది ఇదే సమయంలో ఇవే ప్రాజెక్టుల్లో 106 టీఎంసీల నీరు ఉండేది.

ప్రాజెక్టుల వారీగా చూస్తే, నాగార్జున సాగర్ లో లైవ్ స్టోరేజ్ సామర్థ్యం 180 టీఎంసీలు ఉండగా, ప్రస్తుతం 6.5 టీఎంసీల నీరు మాత్రమే ఉంది. శ్రీరామ్ సాగర్ లో 66 టీఎంసీల కెపాసిటీకి 16 టీఎంసీల నీరు నిల్వ ఉంది. ఈ రెండు ప్రాజెక్టుల కింద 17 లక్షల ఎకరాలకు సాగు నీరు అందించాల్సి ఉండగా, నీటి కొరత రైతులకు ఇబ్బంది కలిగించే అవకాశం ఉంది.

శ్రీశైలం ప్రాజెక్టులో 212 టీఎంసీల లైవ్ స్టోరేజ్ కెపాసిటీ ఉన్నా, ప్రస్తుతం 38.66 టీఎంసీల నీరు మాత్రమే నిల్వ ఉంది. ఇది డెడ్ స్టోరేజీకి చేరుకున్న స్థితి. జూరాల, కడేం, లోయర్ మానేరు, నిజాం సాగర్, సింగూరు, మూసి ప్రాజెక్టుల నీటి నిల్వలు కూడా తీవ్రంగా పడిపోయినట్లు CWC డేటా సూచిస్తోంది.

ఎల్నినో ప్రభావం వల్ల ఈ ఏడాది వర్షపాతం తక్కువగా ఉండడంతో ప్రాజెక్టుల్లోకి వరద రాక లేకపోయింది. రాష్ట్ర ప్రభుత్వం రెండు మూడేళ్ల కిందట అభివృద్ధి చేసిన ఇరిగేషన్ డెసిషన్ సపోర్ట్ సిస్టమ్ (IDSS) డేటాకు, CWC RSMS డేటాకు తేడా ఉంటున్నట్లు నిపుణులు గుర్తించారు.