ఖాజాగూడలో 4 ఎకరాల భూమిపై హైడ్రా పనులపై కుటుంబం నిరసన

సేరిలింగంపల్లి మండలం ఖాజాగూడ గ్రామంలో హైడ్రా చేపట్టిన సుందరీకరణ పనులను ఆపాలని పెద్దగోని కుటుంబం నిరసన తెలిపింది.

తమకు ఎటువంటి ముందస్తు నోటీసులు ఇవ్వకుండా హైడ్రా పనులు ప్రారంభించిందని కుటుంబ సభ్యులు ఆరోపించారు. ఈ భూమి తమ కుటుంబానికి చెందినదని, తమ వద్ద పట్టా, పహాణీలతో సహా అన్ని రెవెన్యూ రికార్డులు ఉన్నాయని చెప్పారు. ఎలాంటి చట్టపరమైన ఆధారాలు లేకుండా భూ రికార్డులను మార్చారని ఆరోపించారు.

కోర్టు స్టే ఉత్తర్వులు ఉన్నప్పటికీ హైడ్రా అధికారులు వాటిని పట్టించుకోవడం లేదని వారు వాపోయారు. పనులను ఆపాలని కాంట్రాక్టర్‌ను అడిగితే, హైడ్రా కమిషనర్ కార్యాలయంలో ఫిర్యాదు చేయాలని చెప్పారని తెలిపారు. గతంలో ఫిర్యాదు చేసినా స్పందన రాలేదని, పనులు కొనసాగుతున్నాయని చెప్పారు.

హైడ్రా కమిషనర్ వెంటనే స్పందించి న్యాయం చేయాలని పెద్దగోని కుటుంబం డిమాండ్ చేసింది. ఈ విషయంపై హైడ్రా అధికారుల స్పందన తెలియాల్సి ఉంది.