బనకచెర్ల ప్రాజెక్టుపై సుప్రీంలో తెలంగాణ పిటిషన్‌లో లోపాలు సరిదిద్దాలని కోర్టు సూచన

తెలంగాణ ప్రభుత్వం దాఖలు చేసిన బనకచెర్ల ప్రాజెక్ట్ పిటిషన్‌పై సుప్రీం కోర్టులో విచారణ జరిగింది. జస్టిస్ విక్రమ్ నాథ్ ధర్మాసనం పిటిషన్‌లో లోపాలు ఉన్నాయని, వాటిని సరిదిద్దిన తర్వాతే విచారణ జరుగుతుందని తెలిపింది.

ఆంధ్రప్రదేశ్ ప్రభుత్వం చేపట్టనున్న బనకచెర్ల ప్రాజెక్టును నిలిపివేయాలని, ఇంజెక్షన్ ఆర్డర్ ఇవ్వాలని, అలాగే ఎపికి నోటీసులు జారీ చేయాలని తెలంగాణ ప్రభుత్వం సుప్రీం‌కోర్టును ఆశ్రయించింది. అయితే ప్రస్తుత పిటిషన్ నిబంధనలకు విరుద్ధంగా లిస్ట్ అయిందని, లోపాలు సరిదిద్దే వరకు ఏపీ ప్రభుత్వానికి నోటీసులు ఇవ్వలేమని ధర్మాసనం స్పష్టం చేసింది.

తెలంగాణకు కేటాయించాల్సిన నీటిపై పూర్తి స్పష్టత రాకుండా, తెలంగాణ ప్రాజెక్టుల నిర్మాణం పూర్తవకముందే ఆంధ్రప్రదేశ్ ఈ ప్రాజెక్ట్ చేపట్టడాన్ని తెలంగాణ ప్రభుత్వం వ్యతిరేకిస్తోంది. ఈ విషయంపై కేంద్ర జలశక్తి మంత్రికి ఇప్పటికే ఫిర్యాదు చేసింది.

పిటిషన్‌లో అవసరమైన మార్పులు చేసి మళ్లీ విచారణకు రావాలని సుప్రీం కోర్ట్ సూచించింది. పిటిషన్ సరిదిద్దిన తర్వాత తదుపరి విచారణ జరిగే అవకాశం ఉంది. ఈ విషయంలో ఆంధ్రప్రదేశ్ ప్రభుత్వ స్పందన తెలియాల్సి ఉంది.