హైటెక్ సిటీ రైల్వే స్టేషన్ ఆధునికీకరణ పూర్తి, ఈ నెల 17న వర్చువల్‌గా ప్రారంభించనున్న ప్రధాని మోదీ

హైదరాబాద్‌లోని హైటెక్ సిటీ రైల్వే స్టేషన్ ఆధునికీకరణ పనులు పూర్తయ్యాయి. అమృత్ భారత్ స్టేషన్ స్కీమ్‌లో భాగంగా ఈ స్టేషన్‌ను ఎయిర్‌పోర్ట్ తరహాలో పునర్నిర్మించారు.

దక్షిణ మధ్య రైల్వే అధికారుల ప్రకారం, ఈ నెల 17వ తేదీన ప్రధాని నరేంద్ర మోదీ వర్చువల్‌గా స్టేషన్‌ను పునఃప్రారంభిస్తారు. ఐటీ కారిడార్, ఫైనాన్షియల్ డిస్ట్రిక్ట్ ఉన్న ఈ ప్రాంతంలో సాఫ్ట్‌వేర్ ఉద్యోగులతో పాటు వేలాది మంది ప్రయాణికులు రోజూ ఈ స్టేషన్ ఉపయోగిస్తారు.

స్టేషన్‌లో 150 మంది కూర్చోగలిగే విశాలమైన వెయిటింగ్ హాల్, డిజిటల్ స్క్రీన్లు, పెద్ద ఫ్యాన్లతో కూలింగ్ సౌకర్యం ఏర్పాటు చేశారు. టికెట్ కౌంటర్లు కూడా ఆధునికీకరించారు. ఫుట్ ఓవర్ బ్రిడ్జ్ వెడల్పు 2 మీటర్ల నుంచి 12 మీటర్లకు పెంచారు, దీనిపై గ్రానైట్ టైల్స్ వేశారు. ప్రతి ప్లాట్‌ఫారంపై రెండు లిఫ్ట్లు, ఎస్కలేటర్లు, దివ్యాంగులకు ర్యాంప్ సౌకర్యం అందుబాటులో ఉన్నాయి. స్టేషన్ ముందు భాగంలో ల్యాండ్‌స్కేపింగ్ చేసి రాత్రి వెలుగులు ఏర్పాటు చేశారు.

ఈ స్టేషన్ నుంచి రోజూ 64 రైళ్లు వెళ్తాయి, సుమారు 3000 మందికి పైగా ప్రయాణికులు ప్రయాణిస్తారు. అమృత్ భారత్ స్టేషన్ స్కీమ్‌లో దేశవ్యాప్తంగా 1300 పైగా స్టేషన్ల ఆధునికీకరణ జరుగుతోంది. హైదరాబాద్‌లో సికింద్రాబాద్, నాంపల్లి స్టేషన్ల పనులు ఇంకా కొనసాగుతుండగా, చెర్లపల్లి స్టేషన్ ఇప్పటికే పూర్తైంది.