ఇరాన్-అమెరికా వివాదంతో ఇంధన సంక్షోభం, సనంద్‌లో సెమీకండక్టర్ ప్లాంట్: ప్రధాని మోదీ

ప్రధాని నరేంద్ర మోదీ ఇరాన్-అమెరికా మధ్య తలెత్తిన ఉద్రిక్తతల వల్ల భారత్‌కు ఊహించని సవాళ్లు ఎదురయ్యాయని అన్నారు. ఇంధన సరఫరాలో అంతరాయం కారణంగా ఆయిల్ కంపెనీలు 75 వేల కోట్ల రూపాయలకు పైగా నష్టపోయాయని తెలిపారు. ఆ నష్టాన్ని కేంద్రం భరించిందని, ప్రజలపై భారం పడకుండా పెట్రోల్, డీజిల్‌పై లీటరుకు రూ. 10 చొప్పున ఎక్సైజ్ సుంకాన్ని తగ్గించామని వివరించారు.

పశ్చిమాసియా సంక్షోభం సమయంలో ముడి చమురు ధర బ్యారెల్‌కు 70 డాలర్ల నుంచి 120 డాలర్లకు పెరిగిందన్నారు. అనేక దేశాల్లో ఇంధన ధరలు 40 నుంచి 50 శాతం వరకు పెరిగాయని, కానీ భారత్ ఇలాంటి పరిస్థితిని ఎదుర్కోలేదని మోదీ స్పష్టం చేశారు. గృహ వినియోగ గ్యాస్ సిలిండర్ ధర రూ. 2 వేల వరకు వెళ్లే ప్రమాదం ఉందని, ప్రభుత్వం దాన్ని రూ. 950 లోపే నిలిపిందని పేర్కొన్నారు. సంక్షోభానికి ముందు 25 దేశాల నుంచి చమురు కొనుగోలు చేస్తే, యుద్ధ సమయంలో 40 కి పైగా దేశాల నుంచి దిగుమతి చేసుకున్నామన్నారు. ప్రపంచ దేశాలతో స్నేహం వల్లే ఈ వ్యూహం సాధ్యపడిందని చెప్పారు.

రాజస్థాన్‌లోని బలోత్రాలో పర్యటించిన ప్రధాని రూ. 6 వేల కోట్ల విలువైన వివిధ అభివృద్ధి ప్రాజెక్టులకు శంకుస్థాపన చేశారు. అలాగే గుజరాత్‌లోని సనంద్‌లో CG సెమీ అవుట్‌సోర్స్డ్ సెమీకండక్టర్ అసెంబ్లీ అండ్ టెస్ట్ కేంద్రాన్ని ప్రారంభించారు. ఈ ప్లాంట్‌ను రూ. 7,500 కోట్ల నిధులతో ఏర్పాటు చేశామని, ఇది భారత్, జపాన్, థాయిలాండ్ భాగస్వామ్యంతో రూపుదిద్దుకుందని తెలిపారు.

సెమీకండక్టర్ రంగం ప్రపంచ పారిశ్రామిక శక్తిగా ఎదగడంలో కీలకమని మోదీ అన్నారు. అమెరికాలోని సిలికాన్ వ్యాలీ, తైవాన్‌లోని సించు సైన్స్ పార్క్, జపాన్‌లోని సిలికాన్ ఐలాండ్ లాంటి ఉదాహరణలను ప్రస్తావించారు. సనంద్ కూడా అదే దిశగా ప్రయాణిస్తోందని ఆశాభావం వ్యక్తం చేశారు. ప్లాంట్‌ను సందర్శించి ఉత్పత్తి సామర్థ్యంపై అధికారులను అడిగి తెలుసుకున్నారు.