మోదీ ప్రభుత్వం 12 ఏళ్ల సంక్షేమ పథకాల వివరాలు విడుదల

ప్రధాని నరేంద్ర మోదీ నేతృత్వంలోని కేంద్ర ప్రభుత్వం 12 ఏళ్ల పాలనలో అమలు చేసిన సంక్షేమ పథకాల వివరాలను విడుదల చేసింది. ఈ పథకాల ద్వారా సామాన్యుల జీవన స్థితిగతులు మెరుగుపడ్డాయని కేంద్రం పేర్కొంది.

స్వచ్ఛ భారత్ మిషన్ కింద దేశవ్యాప్తంగా 11.5 కోట్లకు పైగా మరుగుదొడ్లను నిర్మించినట్లు తెలిపింది. ఇలా నిర్మించిన మరుగుదొడ్లతో మహిళలకు భద్రత, గౌరవం లభించిందని ప్రభుత్వం చెప్పింది. పీఎం ఆవాస్ యోజనతో 4.2 కోట్లకు పైగా పక్కా గృహాలను నిర్మించి పేదలకు అందించినట్లు వెల్లడించారు. జల్‌జీవన్ మిషన్ ద్వారా 12.6 కోట్లకు పైగా గ్రామీణ కుటుంబాలకు పైపుల నీటి కనెక్షన్లు ఇచ్చినట్లు కేంద్రం తెలిపింది.

పీఎం ఉజ్వల యోజన కింద 10 కోట్లకు పైగా ఉచిత గ్యాస్ కనెక్షన్లు పంపిణీ చేశామని, దీంతో శ్వాసకోస వ్యాధులు 20% తగ్గాయని ప్రభుత్వం చెబుతోంది. పీఎం సౌభాగ్య యోజనతో 2.8 కోట్ల ఇళ్లకు ఉచిత విద్యుత్ కనెక్షన్లు ఇచ్చినట్లు పేర్కొంది. ఆయుష్మాన్ భారత్ ద్వారా 55 కోట్ల మంది పేదలకు ఉచిత వైద్యం అందిస్తున్నామని తెలిపింది.

దేశవ్యాప్తంగా 10 వేలకు పైగా జనౌషధి కేంద్రాలు ఏర్పాటు చేసి మందుల ధరలను 50% నుంచి 90% వరకు తగ్గించామని ప్రభుత్వం చెప్పింది. ఒక లబ్ధిదారు మాట్లాడుతూ, జనౌషధి కేంద్రంలో ₹300కే వైద్యం సామగ్రి లభిస్తుందని, ఇతర ప్రాంతాల్లో అదే పెట్టె ధర ₹1400-1600 ఉంటుందని తెలిపారు.

పీఎం స్వనిధి, పీఎం విశ్వకర్మ పథకాలతో చిన్న వ్యాపారులకు రుణాలు అందించామని కేంద్రం పేర్కొంది. పీఎం విశ్వకర్మ స్కీమ్ కింద రుణం పొందిన ఒక లబ్ధిదారు, తనకు ₹1 లక్ష రుణం మంజూరైందని, దానితో తన వృత్తికి సంబంధించిన సామగ్రి కొనుగోలు చేశానని చెప్పారు.

పీఎం వికసిత భారత్ ఉపాధి యోజన కింద లక్ష కోట్లతో 3.5 కోట్ల కొత్త ఉపాధి అవకాశాలు సృష్టిస్తున్నట్లు ప్రభుత్వం తెలిపింది. పీఎం కౌశల్ వికాస్ యోజనతో 1.6 కోట్ల మంది యువతకు శిక్షణ ఇచ్చామని, పీఎం శ్రమయోగి మాంధన్ యోజన కింద 53 లక్షల మంది అసంఘటిత రంగ కార్మికులు రిజిస్టర్ చేసుకున్నారని వెల్లడించింది. ఒలింపిక్స్ లక్ష్యంగా టాప్స్ పథకం కింద ప్రపంచ స్థాయి శిక్షణ ఇస్తున్నట్లు తెలిపింది.

ఈ వివరాలు కేంద్ర ప్రభుత్వ స్వీయ గణాంకాల ప్రకారం ఇచ్చినవి. స్వతంత్రంగా వీటిని ధృవీకరించలేదు.