ఖమ్మం జిల్లాలో వ్యక్తిపై కోతుల దాడి, 11 నెలల చిన్నారికి స్వల్ప గాయాలు

ఖమ్మం జిల్లా పెనుబల్లి మండలం విఎం బంజరాలో ఒక వ్యక్తిపై కోతుల గుంపు దాడి చేసింది. బంకురి మాధవ అనే వ్యక్తి తన 11 నెలల కుమార్తెను ఎత్తుకుని సాయంత్రం 6 గంటల సమయంలో దుకాణానికి వెళ్తున్నారు.

ఈ సమయంలో ఒక పిల్ల కోతి ఆయనపైకి దూకడంతో కింద పడిపోయారు. వెంటనే అక్కడున్న సుమారు 20 కోతులు మాధవపై గుంపుగా దాడి చేశాయి. తన కూతురిని రక్షించుకునే ప్రయత్నంలో ఆయన తీవ్రంగా గాయపడ్డారు.

చిన్నారికి కొన్ని స్వల్ప గాయాలు మాత్రమే అయ్యాయి. స్థానికులు కర్రలతో కోతులను తరిమి వేయడంతో ప్రమాదం నుంచి బయటపడ్డారు. గాయపడిన మాధవను పెనుబల్లి ప్రభుత్వ ఆసుపత్రికి తరలించి చికిత్స అందించారు.

గ్రామంలో కోతుల సంచారం పెరిగిందని, తగిన చర్యలు తీసుకోవాలని బాధితుడు మాధవ కోరారు. ఈ విషయంపై అటవీశాఖ అధికారులు ఇంకా స్పందించాల్సి ఉంది.