ఉదయం అలారం వాడితే గుండెపై ప్రభావం పడే ప్రమాదమా? నిపుణులు ఏమంటున్నారు

ప్రతి ఉదయం అలారంతో నిద్ర లేచేవారి గుండెపై దీర్ఘకాలంలో ప్రతికూల ప్రభావం ఉండే అవకాశం ఉందని వైద్య నిపుణులు హెచ్చరిస్తున్నారు.

అకస్మాత్తుగా మోగే అలారం శబ్దం వల్ల శరీరం ఒక్కసారిగా అలర్ట్ మోడ్‌లోకి వెళుతుంది. ఈ సమయంలో కార్టిసాల్ వంటి స్ట్రెస్ హార్మోన్లు విడుదలవుతాయి. ఫలితంగా గుండె వేగంగా కొట్టుకోవడం, రక్తపోటు పెరగడం జరుగుతుందని నిపుణులు వివరిస్తున్నారు.

కొన్ని రోజులు, వారాలు అప్పుడప్పుడు అలారం వాడితే పెద్ద సమస్య ఉండదు. కానీ ఏళ్ల తరబడి ప్రతిరోజు అలారంపై ఆధారపడటం, ముఖ్యంగా స్నూజ్ చేస్తూ మళ్లీ నిద్రపోవడం వల్ల గుండెపై ఒత్తిడి పెరిగే ప్రమాదం ఎక్కువగా ఉంటుంది.

రాత్రి సరిపడా నిద్ర లేకుండా, బలవంతంగా అలారంతో లేచేవారిలో అలసట, చిరాకు, ఏకాగ్రత లోపం కూడా కనిపిస్తాయి. అలారం పూర్తిగా మానేయాల్సిన అవసరం లేదని, స్థిరమైన నిద్ర షెడ్యూల్ పాటిస్తే సహజంగానే సమయానికి మెలకువ వస్తుందని నిపుణులు సూచిస్తున్నారు.

అవసరమైనప్పుడు మాత్రమే అలారం వాడాలని, లౌడ్ సౌండ్ కాకుండా నెమ్మదిగా పెరిగే సున్నితమైన టోన్లను ఎంచుకోవాలని వారు సలహా ఇస్తున్నారు.