ముద్రగడ పద్మనాభం అంత్యక్రియలకు కుమార్తె క్రాంతి రాక.. మద్దతుదారుల నిరసన

కాపు ఉద్యమ నేత ముద్రగడ పద్మనాభం అంత్యక్రియలు ఈ రోజు కిర్లంపూడిలోని ఆయన నివాసంలో జరగనున్నాయి. అనారోగ్యంతో నిన్న ఆయన కన్నుమూశారు. అధికార లాంచనాలతో అంత్యక్రియలు నిర్వహించనున్నారు.

అంత్యక్రియల సందర్భంగా ఆయన కుమార్తె క్రాంతి తండ్రిని చివరిసారి చూసేందుకు వచ్చారు. గ్రామంలోకి అనుమతించకుండా పోలీసులు ముందుగా ఆమెను అడ్డుకున్నారు. కొన్ని షరతులతో అనంతరం నివాసం వద్దకు తీసుకెళ్లారు. ఈ సమయంలో ముద్రగడ మద్దతుదారులు ఆమెపై 'గో బ్యాక్ క్రాంతి' అంటూ నినాదాలు చేశారు. పోలీసు భద్రత మధ్య ఆమె తండ్రికి నివాళి అర్పించి వెనుతిరిగారు.

ముద్రగడ పద్మనాభం 1953లో తూర్పు గోదావరి జిల్లా కిర్లంపూడిలో జన్మించారు. 1978లో జనతా పార్టీ నుంచి తొలిసారి ఎమ్మెల్యేగా గెలిచారు. అనంతరం టీడీపీలో చేరి 1983, 1985 ఎన్నికల్లో విజయం సాధించారు. నాలుగుసార్లు ఎమ్మెల్యేగా, ఒకసారి కాకినాడ లోక్‌సభ సభ్యుడిగా పనిచేశారు. ఉమ్మడి ఆంధ్రప్రదేశ్‌లో మంత్రిగా కూడా ఉన్నారు. కాపు రిజర్వేషన్ల కోసం పలు ఉద్యమాలు చేపట్టారు.

ఆయన కోరిక మేరకు దహనం కాకుండా నివాసం వద్దే ఖననం చేయనున్నారు. భార్యను సుమంగలిగా ఉంచాలని, తనపై ఎలాంటి కార్యక్రమాలు చేయవద్దని ఆయన కుటుంబ సభ్యులకు చెప్పినట్లు తెలిసింది. పలు పార్టీల నాయకులు, మద్దతుదారులు నివాళి అర్పించేందుకు పెద్ద సంఖ్యలో తరలివస్తున్నారు.