ముంబై-పూణే మిస్సింగ్ లింక్‌లో కొండచరియలు: ప్రారంభించిన 2 నెలలకే మూత, ట్రాఫిక్ జామ్‌లో చిక్కుకున్న వేలాది ప్రయాణికులు

ముంబై-పూణే ఎక్స్‌ప్రెస్ వేపై కేవలం రెండు నెలల క్రితం ప్రారంభించిన ₹6,700 కోట్ల ‘మిస్సింగ్ లింక్’ కారిడార్‌లో భారీ వర్షాల కారణంగా కొండచరియ విరిగి పడడంతో ఆ మార్గాన్ని మూసివేశారు. పూణే నుంచి ముంబై వెళ్లే క్యారేజ్‌వేను అధికారులు బంద్ చేసి, ట్రాఫిక్‌ను లోనావాలా మీదుగా మళ్లించారు. దీంతో రాకపోకలు పూర్తిగా నిలిచిపోయి వేలాది వాహనదారులు గంటల తరబడి రోడ్లపై నిలిచిపోయారు. ఈ 13 కి.మీ.ల మార్గం ప్రమాదకర ఖండాలా ఘాట్ వైపు రాకుండా ప్రయాణ సమయాన్ని అరగంట తగ్గించేందుకు నిర్మించారు. సహ్యాద్రి కొండల గుండా వెళ్లే ఈ ప్రాజెక్టును గత రెండు నెలల కిందటే ప్రారంభించగా, తొలి వర్షాకాలంలోనే నీటి లీకేజీ, సొరంగాల లోపలికి నీరు చేరడం, రహదారి దెబ్బతినడం వంటి సమస్యలు బయటపడ్డాయి. కాంగ్రెస్ పార్టీ ఈ పరిణామంపై ముఖ్యమంత్రి దేవేంద్ర ఫడణవీస్‌పై విమర్శలు గుప్పిస్తూ ఆయన్ను ‘డిజాస్టర్ మ్యాన్’ అని ఎద్దేవా చేసింది. ప్రాజెక్టు నిర్మాణంలో పేలవమైన క్వాలిటీ, అవినీతి ఆరోపణలు చేసింది. అయితే, ఉప ముఖ్యమంత్రి ఏక్‌నాథ్ షిండే ట్వీట్ చేస్తూ, ట్రాఫిక్ సమస్య క్లియర్ అయ్యే వరకు ముంబై-పూణే ప్రయాణాలు వాయిదా వేసుకోవాలని ప్రజలను కోరారు. భారీ వర్షం కారణంగా సహాయక చర్యలు మందగించాయి. అధికారులు రోడ్లపై నుంచి కొండచరియ శిథిలాలను తొలగించే పనిలో నిమగ్నమయ్యారు. ఈ రద్దీ మార్గం మూతపడడంతో ప్రయాణికులు తీవ్ర అవస్థలు ఎదుర్కొంటున్నారు.