ముంబైలో భారీ వర్షాలు: రవాణా స్తంభించింది, 6 మంది మృతి, రెడ్ అలర్ట్

ముంబై, పూణే నగరాలపై భారీ వర్షాలు బీభత్సం సృష్టిస్తున్నాయి. ఐఎండీ మరోసారి రెడ్ అలర్ట్ జారీ చేసింది. వరదలు, కొండచరియలతో రవాణా వ్యవస్థ స్తంభించింది. రోడ్లు జలమయం అయ్యాయి, చెట్లు కూలిపోయాయి, విద్యుత్ సరఫరా నిలిచిపోయింది.

ముంబై-పూణే ఎక్స్‌ప్రెస్‌వే, పాత జాతీయ రహదారిని మూసివేశారు. ముంబై-పూణే రైలు మార్గంలో 16 రైళ్లు రద్దు కాగా, 9 రైళ్లను దారి మళ్లించారు. అనేక లాంగ్ డిస్టెన్స్ రైళ్లను రద్దు చేయడం లేదా మధ్యలో నిలిపివేయడం జరిగింది. విమానాశ్రయంలో గంట పాటు విమానాలు నిలిచిపోయాయి, అనేక విమానాలు ఆలస్యంగా నడుస్తున్నాయి. ఖండాలా మంకీ హిల్, ఠాకుర్వాడి సమీపంలో కొండచరియలు విరిగిపడడంతో మూడు రైల్వే ట్రాక్‌లు దెబ్బతిన్నాయి.

మాన్కుర్దు ప్రాంతంలో నివాస భవనం కూలి ఆరుగురు చనిపోయారు. కుర్లాలో పెనుగాలులకు చెట్టు కూలి ఓ వృద్ధుడు మృతి చెందాడు. ముంబై, పూణే, ఠాణే, పాల్ఘర్ జిల్లాల్లో అన్ని ప్రభుత్వ, ప్రైవేట్, మున్సిపల్ పాఠశాలలు, కళాశాలలకు సెలవు ప్రకటించారు.

అత్యవసర ప్రయాణాలు తప్ప ముంబై-పూణే మధ్య ప్రయాణాలు చేయొద్దని పోలీసులు సూచించారు. పరిస్థితులు అదుపులోకి వచ్చే వరకు ప్రయాణాలను వాయిదా వేసుకోవాలని విజ్ఞప్తి చేశారు.