అంధ విద్యార్థులతో కలిసి 61వ వివాహ వార్షికోత్సవం జరుపుకున్న పద్మశ్రీ మురళీమోహన్

సినీ నటుడు, పద్మశ్రీ అవార్డు గ్రహీత ఎం. మురళీమోహన్ తన 61వ వివాహ వార్షికోత్సవాన్ని హైదరాబాద్‌లోని దేవనగర్ ఫౌండేషన్ ఫర్ బ్లైండ్ పాఠశాలలో అంధ విద్యార్థులతో కలిసి జరుపుకున్నారు.

ఈ సందర్భంగా భగవద్గీత ఉపన్యాసకులు గంగాధర శాస్త్రి భగవద్గీత పారాయణం చేశారు. విద్యార్థులు కీర్తనలు, సినిమా పాటలు ఆలపించారు. అనంతరం మురళీమోహన్, ఆయన సతీమణి విద్యార్థులకు భోజనం వడ్డించి, వారితో కలిసి భోజనం చేశారు.

ఈ కార్యక్రమంలో నేత్ర వైద్య నిపుణులు, పద్మశ్రీ అవార్డు గ్రహీత సాయిబాబా గౌడ్, సుమన్ టీవీ డైరెక్టర్ రఘునాథ్, ఆడిటర్ వివేక్ నరసింహ, పాఠశాల నిర్వాహకులు బీఎస్ రావు తదితరులు పాల్గొన్నారు.

దేవనగర్ పాఠశాలలో ప్రస్తుతం 640 మంది అంధ విద్యార్థులు విద్యనభ్యసిస్తున్నారు. వీరికి 60 మంది టీచింగ్ స్టాఫ్, 15 మంది ఉపాధి వలంటీర్లు బోధన చేస్తున్నట్లు నిర్వాహకులు తెలిపారు. ప్రతి 20 మంది విద్యార్థులకు ఒక సెక్షన్‌గా విభజించి బోధిస్తున్నామని, సగటున ఎనిమిది మంది విద్యార్థులకు ఒక టీచర్ ఉన్నారని వారు చెప్పారు.

ఈ సంస్థ 34 సంవత్సరాలు పూర్తి చేసుకొని 35వ సంవత్సరంలోకి అడుగుపెట్టింది. ఇక్కడ చదువుకున్న విద్యార్థులు ఐఐఎం అహ్మదాబాద్, ఐఐటీ ఢిల్లీ, హైదరాబాద్ సెంట్రల్ యూనివర్సిటీ, సత్యభామ యూనివర్సిటీ వంటి ప్రతిష్టాత్మక సంస్థల్లో చేరారని నిర్వాహకులు తెలిపారు.

మురళీమోహన్ మాట్లాడుతూ తన కుటుంబం ఎప్పుడూ పుట్టినరోజులు, వివాహ వార్షికోత్సవాలను అంధ విద్యార్థులు, మానసిక వికలాంగుల పాఠశాలల్లోనే జరుపుకుంటామని చెప్పారు. ఈ నెలలో తన కుటుంబంలో నాలుగు శుభకార్యాలు ఉన్నాయని, అన్నీ ఇదే విధంగా జరుపుకుంటామని తెలిపారు. మే 23న తాను పద్మశ్రీ అవార్డు అందుకోబోతున్నట్లు ప్రకటించారు.

ఈ సంస్థ ప్రతి సంవత్సరం మే నెలలో ఆల్ ఇండియా చెస్ టోర్నమెంట్ ఫర్ బ్లైండ్ నిర్వహిస్తోంది. ఈ ఏడాది 349 మంది జాతీయ, అంతర్జాతీయ స్థాయి క్రీడాకారులు పాల్గొన్నారని నిర్వాహకులు తెలిపారు.