రేవంత్ రెడ్డి విద్యార్హతలపై అనుమానాలు, ఉద్యోగాల హామీ నెరవేర్చాలని కేటీఆర్ డిమాండ్

బీఆర్ఎస్ నేత, మాజీ మంత్రి కేటీఆర్ ఈరోజు ముఖ్యమంత్రి రేవంత్ రెడ్డిపై తీవ్ర విమర్శలు చేశారు. యువత, నిరుద్యోగులు, ఇంజనీర్లకు సంబంధించి సీఎం చేసిన వ్యాఖ్యలకు ప్రతిస్పందిస్తూ, రేవంత్ విద్యార్హతలపై అనుమానాలు వ్యక్తం చేశారు. "ఆయన నకలు కొట్టి పరీక్షలు పాసయ్యారనే నా అనుమానం. సప్లిమెంటరీ పరీక్షలు పాసయ్యారా లేదా అనేది కూడా సందేహమే" అని కేటీఆర్ పేర్కొన్నారు.

తన విద్యా ప్రయాణాన్ని ప్రస్తావిస్తూ, జేఎన్‌యూ ప్రవేశ పరీక్ష, జీఆర్‌ఈ, అమెరికాలో చదువు వంటి అనుభవాలు తనకు వున్నాయని, రేవంత్ ఎప్పుడూ ఒక్క పోటీ పరీక్ష రాసి ఉండరని ఆరోపించారు. "తెలంగాణలో 42 ఫ్లైఓవర్లు, సచివాలయం, ఎస్సారెస్పీ ప్రాజెక్టు నిర్మించినది ఇంజనీర్లే. అలాంటి వాళ్ళను కించపరిచే మాటలు సీఎం మాట్లాడడం సరికాదు" అని కేటీఆర్ అన్నారు.

ఎన్నికల్లో ఇచ్చిన రెండు లక్షల ఉద్యోగాల హామీని వెంటనే నెరవేర్చాలని, జాబ్ క్యాలెండర్ విడుదల చేయాలని డిమాండ్ చేశారు. 10వ తరగతి పాసైన విద్యార్థులకు పదివేలు, డిగ్రీ పూర్తి చేసిన వారికి లక్ష రూపాయలు వంటి సహాయం, స్కూటీలు, నిరుద్యోగ భృతి వంటి వాగ్దానాలను అమలు చేయకుండా ప్రజలను మోసం చేస్తున్నారని ఆరోపించారు.

గతంలో కేసీఆర్ ప్రభుత్వం ప్రారంభించిన సీఎం బ్రేక్‌ఫాస్ట్ స్కీమ్‌ను రెండేళ్లు నిలిపివేసి, ఇప్పుడు సొంత పథకంలా చూపుతున్నారని విమర్శించారు. గురుకుల పాఠశాలల్లో 150 మంది పిల్లల మరణాలు జరిగినప్పటికీ ప్రభుత్వం స్పందించలేదని, విద్యా హక్కు చట్టాన్ని గాలికి వదిలేస్తూ 27 వేల స్కూళ్లను 4 వేలకు కుదించే ప్రతిపాదన తీసుకువచ్చారని కేటీఆర్ ఆరోపించారు.

తొందరలో జరిగే అసెంబ్లీ సమావేశాల్లో నిరుద్యోగం, ఉద్యోగాల అంశాన్ని బీఆర్ఎస్ బలంగా లేవనెత్తుతుందని కేటీఆర్ హెచ్చరించారు. అలాగే, నిరాశతో ఎవరూ తీవ్ర నిర్ణయాలు తీసుకోవద్దని యువతకు విజ్ఞప్తి చేశారు. ఈ విషయంపై ముఖ్యమంత్రి కార్యాలయం స్పందన ఇంకా లేదు.