తెలంగాణ ఆర్టీసీలో 100 కొత్త మినీ బస్సులు; 50 పాత నగరానికి, 50 లాస్ట్ మైల్ కనెక్టివిటీకి

తెలంగాణ రవాణా శాఖ మంత్రి పొన్నం ప్రభాకర్ ఆర్టీసీ కొత్తగా 100 మినీ బస్సులను తీసుకురానున్నట్లు తెలిపారు. వీటిలో 50 బస్సులు హైదరాబాద్ పాత నగరానికి, మరో 50 మెట్రో, MMTS లాస్ట్ మైల్ కనెక్టివిటీకి వినియోగించనున్నారు.

మహాలక్ష్మి పథకం వల్ల బస్ స్టాండ్లలో ప్రయాణికుల సంఖ్య గణనీయంగా పెరిగిందని మంత్రి చెప్పారు. టాయిలెట్లు, సివిల్ వర్క్స్ వంటి మౌలిక సదుపాయాలపై ప్రత్యేక దృష్టి పెడుతున్నట్లు తెలిపారు. కొన్ని పనులు పూర్తయ్యాయని, మరికొన్ని నిర్మాణంలో ఉన్నాయని చెప్పారు.

ఆర్టీసీ ఇప్పటికే 240 బస్సులను రెట్రో ఫిట్ చేసినట్లు మంత్రి వివరించారు. మరో 2,936 బస్సులను సుమారు ₹1,000 కోట్లతో కొనుగోలు చేసినట్లు తెలిపారు. 15 సంవత్సరాలు దాటిన పాత బస్సులను ఆటోమేటిక్‌గా తొలగిస్తారని చెప్పారు.

బస్ స్టాండ్ల అభివృద్ధికి ఎంపీ, ఎంఎల్ఏ, కార్పొరేట్ సంస్థల నిధుల సహకారం తీసుకుంటామని మంత్రి కోరారు. ఆర్టీసీ కార్మికులకు గృహ నిర్మాణ అర్హత ఉండేలా ఆర్టీసీ స్థలాన్ని గృహ నిర్మాణ శాఖకు ఇచ్చినట్లు వివరించారు.