ఉత్తరప్రదేశ్ కాన్పూర్: వ్యాపారి హత్య కేసులో కోడలు షాలు అరెస్ట్

ఉత్తరప్రదేశ్ కాన్పూర్లో ఓ వ్యాపారి హత్య కేసులో ఆయన కోడలు షాలును పోలీసులు అరెస్ట్ చేశారు. రతన్ అర్బిట్ అపార్ట్మెంట్స్లో నివసించే 60 ఏళ్ల వినీత్ మనోజ్ హత్యకు కోడలే సూత్రధారి అని దర్యాప్తులో తేలింది.

వినీత్ మనోజ్ ఫార్మా వ్యాపారి. ఆయన కుమారుడు సుబ్రత్, కోడలు షాలు, ఆరేళ్ల మనవడితో కలిసి ఉండేవారు. ఈ నెల 5వ తేదీ రాత్రి కుమారుడు, కోడలు పార్టీకి వెళ్లారు. తెల్లవారుజామున 5 గంటలకు తిరిగి వచ్చేసరికి వినీత్ మనోజ్ రక్తపు మడుగులో మృతి చెంది కనిపించారు. ఆయనపై కత్తితో దాడి జరిగినట్టు పోలీసులు గుర్తించారు.

పోలీసులు CCTV ఫుటేజీ ఆధారంగా దర్యాప్తు చేశారు. వినీత్ మనోజ్ కుమారుడికి నెలకు ₹35,000, కోడలికి ఇంటి ఖర్చుల కోసం ₹12,000 మాత్రమే ఇచ్చేవారు. ఇంట్లో కుటుంబ సభ్యుల కదలికలపై నిఘా కోసం CCTV కెమెరాలు ఏర్పాటు చేశారు. దీంతో తనకు స్వేచ్ఛ లేదని షాలు అసంతృప్తి చెందారు.

షాలు గతంలో తమ వద్ద పనిచేసిన విశాల్ గౌతమ్కు ₹6 లక్షల సుపారీ ఇచ్చారు. ₹2 లక్షలు అడ్వాన్స్గా, పని పూర్తయ్యాక ₹4 లక్షలు ఇచ్చే ఒప్పందం కుదుర్చుకున్నారు. డూప్లికేట్ తాళాలు చేయించి గౌతమ్కు ఇచ్చారు. షాలు భర్తతో బయటకు వెళ్లి, ఇల్లు ఖాళీగా ఉందని సందేశం పంపారు. గౌతమ్ స్నేహితుడితో కలిసి ఇంట్లోకి ప్రవేశించాడు.

ఇంటికి వచ్చిన వినీత్, కుమారుడి బెడ్రూమ్లో దాక్కున్న హంతకులను గమనించారు. వారు ఆయనను పొడిచి చంపారు. హత్య జరిగిన రోజు షాలు, గౌతమ్ మధ్య 27 సార్లు ఫోన్ కాల్స్ జరిగినట్టు పోలీసులు గుర్తించారు. ఇద్దరు హంతకులను అరెస్ట్ చేసిన తర్వాత విచారణలో షాలు ప్రమేయం తేలింది. దీంతో షాలును కూడా అరెస్ట్ చేశారు. కుమారుడు సుబ్రత్ పాత్రపై దర్యాప్తు కొనసాగుతోంది.