విశాఖలో షేర్ ఆటోలో మహిళ ఆభరణాలు చోరీ: ఇద్దరు మహిళల అరెస్ట్

విశాఖపట్నంలో షేర్ ఆటోలో ప్రయాణించిన మహిళ బంగారు ఆభరణాలు చోరీ కేసులో ఇద్దరు మహిళలను పోలీసులు అరెస్టు చేశారు. గౌతమి అనే మహిళ ఇచ్చిన ఫిర్యాదు ఆధారంగా ఎంవీపీ పోలీసులు దర్యాప్తు చేశారు.

పోలీసుల కథనం ప్రకారం గౌతమి జగదంబ జంక్షన్ వద్ద షాపింగ్ ముగించుకుని ఆటో ఎక్కారు. అదే ఆటోలో ఇద్దరు మహిళలు ఎక్కి ఆమెతో మాటలు కలిపారు. వీరు మధ్యలో సెవెన్ ఇస్ దగ్గర దిగిపోయారు. గౌతమి విశాఖ హాస్పిటల్ వద్ద దిగిన తర్వాత బ్యాగులో చూసుకోగా చిన్న చిన్న బంగారు వస్తువులు కనిపించలేదు.

ఫిర్యాదు అందుకున్న పోలీసులు సంఘటనా స్థలానికి వెళ్లి స్థానిక సీసీటీవీ ఫుటేజీని పరిశీలించారు. పాత నేరస్థుల రికార్డుల ఆధారంగా నిందితులను గుర్తించారు. ఎంవీపీలోని బృందావన్ పార్క్ వద్ద పోలీసులు రావుల వసంత, ఆవుల పార్వతిని అరెస్టు చేశారు. వారి వద్ద నుంచి మూడు తులాల బంగారు ఆభరణాలను స్వాధీనం చేసుకున్నారు.

నిందితులు శ్రీకాకుళం జిల్లాకు చెందిన వారని పోలీసులు తెలిపారు. రావుల వసంతపై 18 కేసులు, ఆవుల పార్వతిపై 12 కేసులు నమోదైనట్లు దర్యాప్తులో తేలింది. వీరు ఖరీదైన దుస్తులు ధరించి ఆటోల్లో ప్రయాణించే మహిళలను టార్గెట్ చేస్తుంటారని పోలీసులు వివరించారు. మాటలతో దృష్టి మరల్చి నగలు, నగదు చోరీ చేస్తారని చెప్పారు.

విశాఖ, శ్రీకాకుళం, తుని, కాకినాడ ప్రాంతాల్లో వీరిపై కేసులు ఉన్నట్లు పోలీసులు గుర్తించారు. షేర్ ఆటోలో విలువైన వస్తువులతో ప్రయాణించేటప్పుడు జాగ్రత్తగా ఉండాలని పోలీసులు సూచించారు. నిందితులను అరెస్టు చేసిన పోలీసులు రిమాండ్‌కు తరలించారు.