అంబేద్కర్ కోనసీమ జిల్లా చించినాడ బ్రిడ్జిపై యువకుడు గోదావరిలోకి దూకిన ఘటన

అంబేద్కర్ కోనసీమ జిల్లా చించినాడ బ్రిడ్జిపై నుంచి ఓ యువకుడు గోదావరిలోకి దూకాడు. బ్రిడ్జి దగ్గర చెప్పులు, సెల్‌ఫోన్ లభించాయి. వాటి ఆధారంగా అతడిని దిండి గ్రామానికి చెందిన దేవ వికాస్‌గా పోలీసులు గుర్తించారు.

వికాస్‌కు వారం క్రితమే వివాహం జరిగినట్లు తెలుస్తోంది. అతని కుటుంబ సభ్యులు, బంధువులు ఆందోళనలో ఉన్నారు. వికాస్ ఆచూకీ కోసం పోలీసులు గాలింపు చేపడుతున్నారు.

ఇదే బ్రిడ్జి వద్ద ఈ మధ్యకాలంలో పలు ఆత్మహత్యాయత్నాలు జరిగాయి. కొద్దిరోజుల క్రితం ఒకే కుటుంబానికి చెందిన నలుగురు గోదావరిలోకి దూకారు. వారిలో ఓ మహిళను జాలర్లు కాపాడారు. తండ్రి, కొడుకుల మృతదేహాలు రెండు రోజుల తర్వాత లభ్యమయ్యాయి. కూతురు ఆచూకీ ఇప్పటివరకు తెలియలేదు.

వరుస ఘటనల నేపథ్యంలో ఏపీ ప్రభుత్వం అప్రమత్తమైంది. రాష్ట్ర మంత్రి నిమ్మల రామనాయుడు బ్రిడ్జి పరిసరాలను పరిశీలించారు. బ్రిడ్జికి ఇరువైపులా ఫెన్సింగ్ ఏర్పాటు చేయాలని అధికారులను ఆదేశించారు. బ్రిడ్జిపై 9 మీటర్ల ఎత్తులో 116 లైటింగ్ పాయింట్లు కూడా ఏర్పాటు చేయాలన్నారు. ప్రాణరక్షణకు ప్రాధాన్యత ఇవ్వాలని, గోదావరి అందాలకు ఆటంకం లేకుండా పనులు చేపట్టాలని సూచించారు.