ఏలూరు జిల్లాలో 7,550 నార్కోటిక్ ఇంజెక్షన్లు స్వాధీనం, వ్యాపారి అరెస్టు

ఏలూరు జిల్లా జంగారెడ్డిగూడెం మండలం వేగవరం గ్రామంలో నార్కోటిక్ ఇంజెక్షన్లు అనధికారంగా విక్రయించిన వ్యాపారిని పోలీసులు అరెస్టు చేశారు.

వేగవరం పామాయిల్ తోటలో పడేసిన ఇంజెక్షన్లను రైతులు చూశారు. అవి ట్రామాడాల్ ఇంజెక్షన్లుగా అధికారులు గుర్తించారు. రైతులు ఇచ్చిన సమాచారంతో పోలీసులు, ఔషధ నియంత్రణ అధికారులు తనిఖీలు మొదలుపెట్టారు.

జంగారెడ్డిగూడెం సాయి సూర్య నగర్‌కు చెందిన లక్ష్మణ్ సాయి కిషోర్ అనే వ్యాపారిని పోలీసులు అదుపులోకి తీసుకున్నారు. ఆయన శ్రీ లక్ష్మీ శ్రీనివాస మెడికల్ ఏజెన్సీ నిర్వహిస్తున్నారు. హైదరాబాద్ నుంచి 20,000 ఇంజెక్షన్లు కొనుగోలు చేసినట్లు తనిఖీల్లో తేలింది.

డాంగే నగర్‌లోని ఓ ఫర్నిచర్ దుకాణంలో 4 అట్టపెట్టెల్లో 7,550 ఇంజెక్షన్లు స్వాధీనం చేసుకున్నారు. విక్రయించిన రికార్డులు లేనట్టు గుర్తించారు. మిగిలిన 12,450 ఇంజెక్షన్లపై దర్యాప్తు కొనసాగుతోంది. నిందితుడు తన అక్రమ వ్యాపారాన్ని విచారణలో ఒప్పుకున్నాడు.