గాంధీనగర్ నిర్మాణ స్థలంలో క్రేన్ కూలి 12–15 మంది కార్మికులు చిక్కుకున్నారు

గుజరాత్ రాజధాని గాంధీనగర్‌లోని కుడాసన్ ప్రాంతంలో ఓ నిర్మాణ స్థలంలో భారీ క్రేన్ కుప్పకూలింది. ఈ ప్రమాదంలో 12 మంది నుంచి 15 మంది కార్మికులు శిథిలాల కింద చిక్కుకున్నట్లు అధికారులు భావిస్తున్నారు.

ప్రమాద సమాచారం అందిన వెంటనే నాలుగు నుంచి ఐదు ఫైర్ ఇంజన్లు, రెస్క్యూ బృందాలు ఘటనా స్థలానికి చేరుకున్నాయి. గుజరాత్ డిప్యూటీ సీఎం హర్ష్ సంఘ్వీ సంఘటనా స్థలంలో ఉండి సహాయక చర్యలను పర్యవేక్షిస్తున్నారు.

కుడాసన్‌లోని ఎంపైర్ స్కీమ్ పేరిట నిర్మాణం జరుగుతున్న స్థలంలో భారీ క్రేన్ పని చేస్తుండగా అది ఒక్కసారిగా కుప్పకూలింది. దాంతో నిర్మాణంలో ఉన్న స్లాబ్ కిందకు పడిపోయింది. ఆ సమయంలో అక్కడ పనిచేస్తున్న కార్మికులు శిథిలాల కింద చిక్కుకున్నారు. మరెంత మంది అక్కడ ఉన్నారనేది స్పష్టంగా తెలియలేదు.

సహాయక చర్యల్లో భాగంగా ఇప్పటివరకు 10 మందికి పైగా కార్మికులను బయటకు తీశారు. గాయపడిన నలుగురిని గాంధీనగర్ సివిల్ హాస్పిటల్‌కు తరలించారు. ఘటనా స్థలంలో అంబులెన్స్‌లు సిద్ధంగా ఉన్నాయి.

ప్రమాదానికి గల కారణం ఇంకా తెలియదు. క్రేన్‌లో సాంకేతిక లోపం వల్ల స్లాబ్ కూలిందా అనే కోణంలో దర్యాప్తు జరుగుతుంది. రాత్రి వేళ నిర్మాణ పనులకు అనుమతులు ఉన్నాయా, నిర్మాణ సంస్థ ఎవరిది అనే వివరాలను కూడా అధికారులు పరిశీలిస్తారు.

కుడాసన్‌లో సహాయక చర్యలు కొనసాగుతున్నాయి.