ఫతేపూర్ ప్రభుత్వ పాఠశాలలో విద్యార్థులు సేంద్రియ కూరగాయలు పండిస్తున్నారు

మహబూబ్‌నగర్ జిల్లా ఫతేపూర్ గ్రామంలోని జిల్లా పరిషత్ ఉన్నత పాఠశాల విద్యార్థులు చదువుతో పాటు సేంద్రియ వ్యవసాయం చేస్తున్నారు. పాఠశాల ఆవరణలోనే కూరగాయలు, ఆకుకూరలు పండిస్తున్నారు.

ఈ పాఠశాలలో 153 మంది విద్యార్థులు చదువుతున్నారు. గత మూడేళ్లుగా విద్యార్థులే బీరకాయ, వంకాయ, టమాటా, పచ్చిమిర్చి పండిస్తున్నారు. ఉపాధ్యాయుల ప్రోత్సాహంతో సేంద్రియ పద్ధతిలో ఈ సాగు జరుగుతోంది.

పండిన కూరగాయలను మధ్యాహ్న భోజనంలో వాడుతున్నారు. దీనివల్ల విద్యార్థులకు పోషకాహారం అందుతుందని ప్రధానోపాధ్యాయురాలు వెంకటమ్మ తెలిపారు. రక్తహీనత తగ్గించడానికి ఇది ఉపయోగపడుతుందని ఆమె చెప్పారు.

ఈ పాఠశాలలో పుట్టినరోజున చాక్లెట్లు పంచే బదులు మొక్క నాటుతారు. ప్రతి విద్యార్థి తన పుట్టినరోజున పూల మొక్క కుండీ తీసుకొస్తారు. ఆ మొక్కలపై విద్యార్థి పేరు రాస్తారు. ప్రస్తుతం పాఠశాలలో 100కు పైగా మొక్కలు ఉన్నాయి.

పాఠశాలలో న్యూట్రి గార్డెన్ ఏర్పాటు వల్ల బయాలజీ పాఠాలు సులభంగా చెప్పగలుగుతున్నామని ఉపాధ్యాయులు తెలిపారు. పర్యావరణం పట్ల విద్యార్థులకు అవగాహన కలుగుతోందని వారు చెప్పారు. వ్యవసాయ కుటుంబాల నుంచి వచ్చిన విద్యార్థులకు ఈ అనుభవం భవిష్యత్తులో ఉపయోగపడుతుందని ఉపాధ్యాయులు రాము, జగదీష్ అన్నారు.

పదో తరగతిలో అందరం 100 శాతం ఉత్తీర్ణత సాధిస్తామని విద్యార్థులు అంటున్నారు.