సిద్దిపేట పాఠశాలలో అగ్గి పెట్టెలతో సెల్ఫ్ అటెండెన్స్ వ్యవస్థ

సిద్దిపేట జిల్లా ముగ్దుంపూర్ ప్రభుత్వ పాఠశాలలో ఓ ఉపాధ్యాయుడు అగ్గి పెట్టెలతో సెల్ఫ్ అటెండెన్స్ వ్యవస్థను ప్రవేశపెట్టారు. పాఠశాలలోని అన్ని తరగతి గదుల్లో ఈ విధానాన్ని అమలు చేశారు.

గోడలకు ఖాళీ అగ్గి పెట్టెలను అతికించి వాటిపై విద్యార్థుల ఫోటోలు పెట్టారు. విద్యార్థులు పాఠశాలకు వచ్చిన వెంటనే తమ అటెండెన్స్ ను స్వయంగా మార్క్ చేసుకుంటారు. అటెండెన్స్ లో P అంటే ప్రెజెంట్, A అంటే అబ్సెంట్ అని సూచిస్తారు.

ఒకవేళ విద్యార్థి పాఠశాలకు రాకపోతే వారి ఫోటోపై అబ్సెంట్ అని కనిపిస్తుంది. ఈ వివరాలు అందరికీ కనిపించడంతో విద్యార్థులు ఆలస్యంగా రావడం, గైర్హాజరు అవడం తగ్గిందని ఉపాధ్యాయులు చెప్తున్నారు. కొందరు విద్యార్థులు పాఠశాల ప్రారంభ సమయం కంటే ముందే వస్తున్నారని తెలిపారు.

ఈ విధానం పట్ల విద్యార్థులు ఉత్సాహంగా ఉన్నారు. తామే అటెండెన్స్ మార్క్ చేసుకోవడం వల్ల ఆసక్తి పెరిగిందని విద్యార్థులు చెప్పారు. పాఠాలు బోరింగ్ గా కాకుండా కొత్తగా, ఆసక్తికరంగా చెప్పడమే లక్ష్యమని ఉపాధ్యాయుడు వివరించారు.