ఆదిలాబాద్ పాఠశాలలో 150కు పైగా మొక్కలు పెంచిన ఉపాధ్యాయులు

ఆదిలాబాద్ దుర్గానగర్ ప్రాథమిక పాఠశాలలో 150కు పైగా మొక్కలు, చెట్లు ఉన్నాయి. పాఠశాలలో విద్యార్థుల సంఖ్య కంటే మొక్కల సంఖ్య ఎక్కువని ఉపాధ్యాయులు తెలిపారు.

ప్రధాన ఉపాధ్యాయుడు బండి స్వామి, మరో ముగ్గురు ఉపాధ్యాయులు కలిసి పాఠశాల ఆవరణలో పండ్లు, పూలు, కూరగాయలు, ఆకుకూరల మొక్కలు పెంచుతున్నారు. మధ్యాహ్న భోజనంలో పాఠశాలలో పండించిన కూరగాయలను వాడుతున్నామని ఉపాధ్యాయులు చెప్పారు.

పిల్లల పుట్టినరోజు సందర్భంగా మొక్కలు నాటిస్తున్నారు. మునగాకు, కరివేపాకు, బీరకాయ, వంకాయ, టమాటా, మిర్చి వంటి మొక్కలు పాఠశాలలో ఉన్నాయి. చేతులు కడుక్కునే నీటిని, కంపోస్టును మొక్కలకు వినియోగిస్తున్నారు. రసాయన ఎరువుల బదులు సేంద్రియ ఎరువులే వాడుతున్నారు.

ఒకప్పుడు 50 మంది ఉన్న విద్యార్థుల సంఖ్య ఇప్పుడు 100 మందికి పెరిగిందని ఉపాధ్యాయులు తెలిపారు. బోధనతో పాటు పచ్చని వాతావరణమే ఇందుకు కారణమని అంటున్నారు.