ఆపరేషన్ సింధూర్‌లో ప్రాణాలు కోల్పోయిన మురళీ నాయక్‌కు నేషనల్ వార్ మెమోరియల్‌లో గౌరవ స్థానం

శ్రీ సత్యసాయి జిల్లాకు చెందిన అగ్నివీర్ జవాన్ మురళీ నాయక్ పేరును ఢిల్లీలోని నేషనల్ వార్ మెమోరియల్‌లో చేర్చారు. ఆపరేషన్ సింధూర్‌లో ప్రాణాలు కోల్పోయిన ఆరుగురు యోధులతో పాటు ఆయన పేరును 3D రూపంలో రాయించారు.

మురళీ నాయక్ 2022లో అగ్నివీర్‌గా భారత సైన్యంలో చేరారు. 2025 మే 8న పహల్గాం ఉగ్రదాడి తర్వాత కేంద్ర ప్రభుత్వం ప్రారంభించిన ఆపరేషన్ సింధూర్‌లో ఆయన పాల్గొన్నారు. ఈ ఆపరేషన్‌లో శత్రు బలగాలతో జరిగిన ఎదురుకాల్పుల్లో మురళీ నాయక్ మృతి చెందారు.

గోరంట్ల మండలం కళ్ళల్లి తండా గ్రామానికి చెందిన జ్యోతిబాయి, శ్రీరామ్ నాయక్ దంపతులకు ఏకైక సంతానం అయిన మురళీ నాయక్ త్యాగాన్ని గుర్తించిన కేంద్రం, వార్ మెమోరియల్‌లో ఆయన పేరును చేర్చి గౌరవించింది. ఈ గుర్తింపు తమకు గర్వకారణమని తల్లిదండ్రులు పేర్కొన్నారు.