ఏపీ డీఎస్సీ నిరసన: వైఎస్ఆర్సీపీ ఎమ్మెల్సీ గోవింద నామాల పేరడీ, టీడీపీ-జనసేన తీవ్ర ఖండింపు

ఏపీ డీఎస్సీ నియామకాల్లో అవకతవకలపై వైఎస్ఆర్ కాంగ్రెస్ పార్టీ నిరసనలు చేపట్టింది. ఇందులో భాగంగా నెల్లూరులో జరిగిన ఓ నిరసనలో వైఎస్ఆర్సీపీ ఎమ్మెల్సీ చంద్రశేఖర్ రెడ్డి తిరుమల గోవింద నామాలను పేరడీ చేశారు. ఈ వీడియో సోషల్ మీడియాలో షేర్ కావడంతో వివాదం చెలరేగింది.

టీడీపీ, జనసేన నేతలు ఈ చర్యను తీవ్రంగా ఖండించారు. టీడీపీ నేత బుచ్చయ్య చౌదరి స్పందిస్తూ, తిరుమలలో భక్తులు పవిత్రంగా పాడే దైవనామాలను రాజకీయ లాభాల కోసం వ్యంగ్యంగా వాడటం సరికాదన్నారు. చంద్రశేఖర్ రెడ్డి విద్యా సంస్థల అధినేతగా ఉండి కూడా ఇలా ప్రవర్తించడం విచారకరమని ఆయన చెప్పారు.

జనసేన అధినేత పవన్ కల్యాణ్ సైతం ఈ ఘటనపై ఆగ్రహం వ్యక్తం చేశారు. వెంకటేశ్వరస్వామిని కొలిచే పవిత్రమైన గోవింద నామాలను పారడీ చేయడం ద్వారా భక్తుల మనోభావాలను దెబ్బతీశారన్నారు. ఇలా మతపరమైన విద్వేషాలు రెచ్చగొట్టే చర్యలకు పాల్పడిన వ్యక్తులపై చట్టపరమైన చర్యలు తీసుకోవాలని పార్టీ నాయకులను ఆదేశించారు.

ఈ విమర్శలపై వైఎస్ఆర్సీపీ నేత, మాజీ మంత్రి కాకాణి గోవర్ధన్ రెడ్డి స్పందించారు. తాను గానీ, చంద్రశేఖర్ రెడ్డి గానీ గోవింద నామాలను పారడీ చేసి పాడలేదని ఆయన స్పష్టం చేశారు. ఒకవేళ కేసు నమోదు చేయాలనుకుంటే, మంత్రి నారా లోకేశ్ పైనే పెట్టాలని సవాలు చేశారు.

ఈ వ్యవహారంపై ఇప్పటివరకు పోలీసులు ఎలాంటి కేసు నమోదు చేయలేదు. జనసేన నాయకులు మాత్రం చట్టపరమైన చర్యలకు డిమాండ్ చేస్తున్నారు.