ఒంగోలు 150 ఏళ్ల వేడుకల్లో ఒంగోలు జాతి ఎద్దుల అందాల పోటీలు

ఒంగోలు మున్సిపాలిటీ 150 సంవత్సరాలు పూర్తి చేసుకుంటున్న సందర్భంగా ఒంగోలు జాతి ఎద్దులకు అందాల పోటీలు నిర్వహిస్తున్నారు. ఈ నెల 28, 29, 30 తేదీల్లో రెండు రాష్ట్రాల నుంచి ఒంగోలు జాతి ఎద్దులను ఆహ్వానించనున్నారు. పోటీల్లో గెలిచే ఎద్దులకు ఆకర్షణీయమైన బహుమతులు అందించనున్నారు.

ఒంగోలు జాతి గిత్తలకు శరీర సౌష్టవం, నడకలో ప్రత్యేకత, తెలివితేటలు ఉన్నాయని పశుపోషకులు చెబుతారు. చరిత్ర పరిశోధకుల ప్రకారం సుమారు నాలుగు వేల సంవత్సరాల క్రితం ఈ జాతి ఒంగోలు ప్రాంతానికి చేరింది. ఒంగోలు సమీపంలో తూర్పున బంగాళాఖాతం, దక్షిణాన పాలేరు, ఉత్తరాన గుండ్లకమ్మ మధ్య ప్రాంతాన్ని ఒంగోలు ట్రాక్‌గా పిలుస్తారు.

ఈ జాతి ఎద్దులను బ్రెజిల్, ఆస్ట్రేలియా, అమెరికా, మెక్సికో, ఇండోనేషియా, ఫిలిప్పీన్స్, కొలంబియా దేశాలు పెంచుతున్నాయి. ప్రపంచవ్యాప్తంగా ఒంగోలు జాతి పశువుల సంఖ్య 15 కోట్లు ఉంటుందని అంచనా. కానీ ఒంగోలు పరిసర ప్రాంతాల్లో వీటి సంఖ్య చాలా తక్కువగా ఉంది.

వ్యవసాయంలో ట్రాక్టర్ల వాడకం పెరగడంతో ఎద్దుల పోషణ ఖర్చు రైతులకు భారంగా మారింది. పోటీల కోసం ఒక జత ఎద్దులకు నెలకు రూ.50 వేల నుంచి రూ.70 వేల వరకు ఖర్చు అవుతుందని పశుపోషకులు తెలిపారు. గెలిచిన ఎద్దుల జత ధర రూ.10 లక్షల నుంచి రూ.30 లక్షల వరకు పలుకుతోంది.

ఈ నేపథ్యంలో మున్సిపాలిటీ 150 ఏళ్ల వేడుకల్లో భాగంగా అందాల పోటీలు నిర్వహిస్తున్నారు. నిర్వాహకులు ఏర్పాట్లు చేస్తున్నారు.