మురుడేశ్వరలో 123 అడుగుల శివుడి విగ్రహం.. కర్ణాటకలో ప్రత్యేక ఆకర్షణ

కర్ణాటకలోని ఉత్తర కన్నడ జిల్లాలో, భత్కల్ సమీపంలో మురుడేశ్వర ఆలయం ఉంది. అరేబియా సముద్ర తీరంలోని కందుక పర్వతం మీద 123 అడుగుల ఎత్తైన శివుడి విగ్రహం దర్శనమిస్తుంది. ప్రపంచంలోనే అతి ఎత్తైన శివ విగ్రహాల్లో ఇది ఒకటని చెబుతారు.

ఈ విగ్రహాన్ని చెక్కడానికి రెండు సంవత్సరాల సమయం పట్టింది. శివమొగ్గకు చెందిన కాశీనాథ్, ఆయన కుమారుడు శ్రీధర్, ఇతర శిల్పులు కలిసి విగ్రహాన్ని తయారు చేశారు. దీనికి సుమారు కోటి రూపాయలు ఖర్చయ్యాయి. సూర్యకిరణాలు విగ్రహం మీద పడినప్పుడు అది మెరిసిపోతుంది.

ఆలయ రాజగోపురం దేశంలోనే అతి పెద్దదిగా చెబుతారు. ఈ గోపురం నిర్మాణం కోసం తంజావూరుకు చెందిన 500 మంది కళాకారులు పదేళ్లు కృషి చేశారు. గోపురంలో 20 అంతస్తులు ఉన్నాయి. ఆలయానికి వెళ్లే మార్గంలో రెండు ఏనుగులు స్వాగతం పలుకుతాయి.

ఈ ఆలయ ప్రస్తావన త్రేతా యుగం నాటిదని స్థల పురాణం చెబుతోంది. రావణుడు తపస్సు చేసి తెచ్చిన ఆత్మలింగాన్ని వినాయకుడు ఇక్కడ ఉంచాడని ప్రతీతి. ఆ లింగం పైనున్న వస్త్రం కందుక పర్వతం మీద పడిందని, దాని నుంచి మృదేశ్వరం అనే పేరు వచ్చిందని చెబుతారు. కాలక్రమంలో అది మురుడేశ్వరంగా మారింది.

గుహలో ఆత్మలింగ దర్శనం, గీతోపదేశం, సూర్యనారాయణ శిల్పం ఇక్కడి ప్రత్యేక ఆకర్షణలు. అరేబియా సముద్రంలో పడవ విహారం, సాయంత్రం సూర్యాస్తమయ దృశ్యం పర్యాటకులను ఆకర్షిస్తాయి.