మూసీ పునరుద్ధరణలో ఎవరికీ నష్టం కలగకుండా చర్యలు: CM రేవంత్ రెడ్డి

మూసీ నది పునరుద్ధరణ పనుల్లో ఎవరికీ నష్టం కలగకుండా చర్యలు తీసుకుంటామని తెలంగాణ CM రేవంత్ రెడ్డి తెలిపారు. ఈ బాధ్యత ప్రభుత్వంతో పాటు ప్రజా ప్రతినిధులందరిదీ అని ఆయన అన్నారు.

నష్టపోయే వారిని ఆదుకోవాల్సిన బాధ్యత ప్రభుత్వంపై ఉందని, ప్రజా ప్రతినిధులు కూడా దానిలో భాగం కావాలని ఆయన విజ్ఞప్తి చేశారు. భేదాభిప్రాయాలు పక్కన పెట్టి అందరూ ఒకే వేదికపైకి రావాలని కోరారు.

నగర అభివృద్ధి, నగర ఆర్థిక వ్యవస్థ నదీ పరివాహక ప్రాంతం చుట్టూనే ఉంటాయని ఆయన చెప్పారు. లేక్ ఎకానమీ, నైట్ ఎకానమీ ఉన్న నగరాలు, దేశాలు వేగంగా అభివృద్ధి చెందాయని ఆయన అన్నారు.

ఉదాహరణకు దక్షిణ కొరియాలో అత్యంత కలుషితమైన నదిని పునరుద్ధరించిన తర్వాత ఆ ప్రాంతంలో 24x7 వ్యాపారాలు, పెద్ద ఎత్తున ఆర్థిక కార్యకలాపాలు నడుస్తున్నాయని ఆయన చెప్పారు.

రాజకీయాలకు అతీతంగా హైదరాబాద్ నగరాన్ని, తెలంగాణ రాష్ట్రాన్ని 21వ శతాబ్దం వైపు నడిపించే ప్రణాళికలు సిద్ధం చేసుకోవాలని CM రేవంత్ రెడ్డి పిలుపు ఇచ్చారు.