మూసీ శుభ్రత పనులపై నిధుల దుర్వినియోగం ఆరోపణలు

హైదరాబాద్ లోని మూసి నది శుభ్రత పనులపై స్థానికులు తీవ్ర ఆరోపణలు చేస్తున్నారు. జీహెచ్ఎంసీ ప్రతి ఏడాది సుమారు 20 కోట్ల రూపాయలతో 55 కిలోమీటర్ల పొడవైన మూసి నది పరివాహక ప్రాంతాన్ని శుభ్రం చేయడానికి టెండర్లు పిలుస్తోంది. కానీ స్థానికులు మాత్రం నది శుభ్రం అవ్వడం లేదని, నిధులు దుర్వినియోగమవుతున్నాయని ఆరోపిస్తున్నారు.

ప్రతి 3 కిలోమీటర్ల మేర శుభ్రత పనులకు ఒక టెండర్ పిలుస్తారు. ఒక్కో టెండర్ విలువ సుమారు 38-39 లక్షలు. నాలుగు నెలల కాల పరిమితిలో పనులు చేయించేందుకు ఈ టెండర్లు కేటాయిస్తారు. కానీ గ్రౌండ్ స్థాయిలో పనులు జరగడం లేదని, బిల్లులు క్లియర్ అవుతున్నప్పటికీ నది శుభ్రం కావడం లేదని స్థానికులు చెబుతున్నారు.

ఇటీవల కార్వాన్ సర్కిల్ లో పురాణానాపూర్ నుంచి అత్తాపూర్ వంతెన వరకు 3 కిలోమీటర్ల మేర శుభ్రత పనులకు 38 లక్షల రూపాయలతో టెండర్ పిలిచారు. అప్పటి ఎగ్జిక్యూటివ్ ఇంజనీర్ లాల్ సింగ్ తనకు అనుకూలమైన సంస్థకు టెండర్ ఇవ్వాలని ప్రయత్నించారని ఇతర కాంట్రాక్టర్లు జీహెచ్ఎంసీ కమిషనర్ కు ఫిర్యాదు చేశారు. దీంతో ఆ టెండర్ రద్దు అయింది. ఇలాంటి అవకతవకలు ఇతర సర్కిల్ల లోనూ జరిగాయనే ఆరోపణలు ఉన్నాయి.

నదిలో ప్లాస్టిక్ వ్యర్థాలు, మట్టి, గుర్రపు డెక్క పేరుకుపోయి నీటి ప్రవాహానికి ఆటంకం కలుగుతోంది. వర్షాలు వచ్చినప్పుడు పరిసర కాలనీలు ముంపును ఎదుర్కొంటున్నాయి. దోమలతో, దుర్వాసనతో ప్రజలు ఇబ్బంది పడుతున్నారు. టెండర్లు పూర్తి చేసినట్లు చూపించి నిధులు పక్కదారి పట్టించినట్లు స్థానికులు ఆరోపిస్తున్నారు.

మూసీ పునరుజ్జీవం పేరుతో ప్రభుత్వం భారీ ప్రణాళికలు అమలు చేస్తున్నప్పటికీ, పనులు సరిగా జరగడం లేదని విమర్శలు వస్తున్నాయి. సమగ్ర విచారణ జరిపి చర్యలు తీసుకోవాలని స్థానికులు డిమాండ్ చేస్తున్నారు. దీనిపై ప్రభుత్వ స్పందన తెలియాల్సి ఉంది.