వరంగల్, ఆదిలాబాద్ విమానాశ్రయాలు 2028 నాటికి పూర్తి: సీఎం రేవంత్ రెడ్డి

తెలంగాణ సీఎం రేవంత్ రెడ్డి ఢిల్లీలో కేంద్ర విమానయాన శాఖ మంత్రి రామ్మోహన్ నాయుడుతో సమావేశమయ్యారు. ఈ సందర్భంగా వరంగల్, ఆదిలాబాద్ విమానాశ్రయాల అభివృద్ధిపై చర్చించారు. రెండు విమానాశ్రయాల నిర్మాణానికి పూర్తి సహకారం అందిస్తామని కేంద్ర మంత్రి తెలిపారు.

వరంగల్ ఎయిర్పోర్ట్‌కు అవసరమైన 700 ఎకరాల భూమి ఇప్పటికే విమానాశ్రయ ప్రాధికార సంస్థ (AAI) వద్ద ఉండగా, మరో 253 ఎకరాలు రాష్ట్ర ప్రభుత్వం సేకరించి ఇచ్చింది. రానున్న 3-4 వారాల్లో టెండర్ల ప్రక్రియ పూర్తి అవుతుందని కేంద్ర మంత్రి తెలిపారు. వరంగల్లో నిర్మించే టర్మినల్‌లో కాకతీయ సంస్కృతి, కళ, దేవాలయాల ప్రతిబింబాలు ఉంటాయని, అంతర్జాతీయ ప్రమాణాలతో దీన్ని రూపొందిస్తామని ఆయన చెప్పారు.

రెండు విమానాశ్రయాలను 2028 జూన్ 2 నాటికి పూర్తి చేయాలని లక్ష్యంగా పెట్టుకున్నట్టు సీఎం రేవంత్ రెడ్డి తెలిపారు. ప్రస్తుతం 5% వాటాతో ఉన్న తెలంగాణ, దేశ జీడీపీలో 10%కి చేరుకోవాలని, 2034 నాటికి ట్రిలియన్ డాలర్ల ఆర్థిక వ్యవస్థగా ఎదగాలని ఆయన స్పష్టం చేశారు. పరిశ్రమల ఆకర్షణ, ఎగుమతులు, వేగవంతమైన అభివృద్ధికి అంతర్జాతీయ స్థాయి విమానాశ్రయాలు అవసరమని సీఎం అభిప్రాయపడ్డారు.

కేంద్ర మంత్రిగా తన హయాంలో తెలంగాణ విమానయాన మౌలిక సదుపాయాల అభివృద్ధికి అవకాశం రావడం సంతోషంగా ఉందని రామ్మోహన్ నాయుడు అన్నారు. జోద్‌పూర్ టర్మినల్‌ని ఉదాహరణగా చెబుతూ, స్థానిక సంస్కృతితో కూడిన అద్భుతమైన టర్మినల్‌లు నిర్మించడంలో కేంద్రం చిత్తశుద్ధితో ఉందని తెలిపారు.