చిన్నతనంలో దొంగతనాలు చేశానని నటుడు తనికెల్ల భరణి వెల్లడి

ప్రముఖ నటుడు, రచయిత తనికెల్ల భరణి తన చిన్నతనంలో దొంగతనాలు చేశానని ఓ ఇంటర్వ్యూలో తెలిపారు. జూలై 14న ఆయన పుట్టినరోజు సందర్భంగా ఆలీతో సరదాగా షోలో గతంలో ఆయన పంచుకున్న విషయాలు వెలుగులోకి వచ్చాయి.

సికింద్రాబాద్‌లోని రైల్వే కాలనీ పక్కనున్న అమల్ బస్తీలో తాను గ్యాంగ్‌తో తిరిగేవాడినని, చిన్న చిన్న దొంగతనాలు చేసేవాడినని భరణి చెప్పారు. "సినిమాలు చూడటం కోసం పేపర్లు పట్టుకెళ్లి అమ్మేసుకునేవాడిని. సిగరెట్ అడిగినవారికి టకాలున ఇచ్చేసేవాడిని. హీరోలను ఆరాధించేవాడిని" అని ఆయన గుర్తు చేసుకున్నారు. ఈ క్రమంలో చదువు పూర్తిగా పోయి, తప్పుడు మార్గంలో వెళ్లే సమయంలో తన జీవితంలో గురువు ప్రవేశించారని వివరించారు.

ప్రముఖ నాటక రచయిత, నటుడు రాళ్లపల్లి వెంకట నరసింహారావు తనకు దొరికిన గురువు అని భరణి తెలిపారు. కళాశాల విద్యార్థిగా ఉన్నప్పుడు తాను రాసిన తొలి నాటకం "అద్దెకొంప"కు మొదటి బహుమతి వచ్చిందని, ఆ అనుభవంతో నాటక సమాజం నవీన్ కళామందిర్ ను స్థాపించానని చెప్పారు. తన సంఘం ప్రారంభోత్సవానికి రాళ్లపల్లిని ఆహ్వానించడంతో ఆయన జీవితమే మారిపోయిందని, అప్పటి నుంచి తన సొంత ఇంటి కంటే గురువు ఇంట్లోనే ఎక్కువ సమయం గడిపేవాడినని భరణి వెల్లడించారు. నేటికీ ఆయన తనకు దైవ సమానుడని భరణి అభివర్ణించారు.