బ్యాంకు ఖాతాలో రూ.759 కోట్ల బ్యాలెన్స్ చూసి షాకైన బీహార్ పెన్షనర్

బీహార్‌లో ఒక పెన్షనర్ తన బ్యాంకు ఖాతాలో రూ.759.69 కోట్ల బ్యాలెన్స్ ఉండటంతో ఆశ్చర్యపోయారు. కామేశ్వర్ మిశ్రా అనే ఈ పెన్షనర్ నెలకు రూ.100 సామాజిక భద్రతా పింఛను పొందుతున్నారు. తన మూగ, చెవిటి కుమారుడితో కలిసి బ్యాంకుకు వెళ్లి పెన్షన్ డబ్బు తీసుకున్నారు. అనంతరం ఖాతా బ్యాలెన్స్ అడగ్గా బ్యాంకు సిబ్బంది ఇచ్చిన సమాధానం ఆయన్ను నమ్మలేని స్థితికి నెట్టింది. ఖాతాలో రూ.7,59,69,51,951.16 ఉన్నట్లు తెలియగానే మిశ్రా ఒక్కసారిగా షాక్‌కు గురయ్యారు. కేవలం పెన్షనర్ ఖాతాలోనే కాకుండా ఆయన వికలాంగ కుమారుడి ఖాతాలోనూ ఇదే మొత్తం ఉన్నట్టు బ్యాంకు సిబ్బంది తెలియజేశారు. దీంతో రెండు ఖాతాల్లో కలిపి సుమారు రూ.1,519 కోట్లు జమ అయినట్లయింది. బ్యాంకు సిబ్బంది సైతం ఇంత భారీ మొత్తం చూసి ఆశ్చర్యపోయారని మిశ్రా తెలిపారు. నిరుపేదకు ఇంత డబ్బు ఎలా వచ్చిందన్న ప్రశ్న తలెత్తింది. బ్యాంకు సాంకేతిక లోపం వల్లే ఈ తప్పు జరిగిందని, అధికారులు ఈ విషయాన్ని పరిశీలిస్తున్నారని భావిస్తున్నారు. మిశ్రా ఈ సంఘటనను బ్యాంకు యాజమాన్యానికి నివేదించగా, ఎంత త్వరగా ఈ లోపం సరిచేస్తారనేది తేలాల్సి ఉంది.