CPS ఉద్యోగులకు తొలి విజయం: 2003 DSC అభ్యర్థులకు OPS వర్తింపు

ఆంధ్రప్రదేశ్‌లో సెప్టెంబర్ 1, 2004 కంటే ముందు నోటిఫికేషన్ వచ్చి ఆ తర్వాత ఉద్యోగాల్లో చేరిన వారికి, ముఖ్యంగా 2003 DSC అభ్యర్థులకు, పాత పెన్షన్ విధానం OPS అమలు చేస్తూ కూటమి ప్రభుత్వం జీఓ జారీ చేసింది. దీంతో ఉద్యోగ వర్గాల్లో పెద్ద ఊరట లభించింది. అర్హులైన ఉద్యోగులు CPS నుంచి OPS కు మారేందుకు మూడు నెలల గడువు ఇస్తూ ప్రభుత్వం ఉత్తరవులు జారీ చేసింది.

ఈ నిర్ణయాన్ని APCPSCSA అంటే ఆంధ్రప్రదేశ్ CPS ఉద్యోగుల సంఘం స్వాగతించింది. ఈ చారిత్రాత్మక విజయం వెనుక ఎన్నో సంవత్సరాల రక్తం చెమట ఉన్నాయని సంఘం గుర్తు చేసింది. విశాఖపట్నంలో సాగర ఘోష, కడపలో మహాసంకల్ప గర్జన, అనంతపురంలో మహాసంగ్రామం, విజయవాడలో పెన్షన్ మార్చ్, రాష్ట్రంలోని 26 జిల్లాల్లో నిర్వహించిన CPS ఉద్యోగుల చైతన్య యాత్రలు, అలాగే DA బకాయిలపై హైకోర్టులో సాగించిన న్యాయ పోరాటం వల్లే నేడు ప్రభుత్వాలు దిగివస్తున్నాయని APCPSCSA స్పష్టం చేసింది.

తాము అధికారంలోకి వస్తే ఉద్యోగులకు న్యాయం చేస్తామని ఇచ్చిన మాట నిలబెట్టుకున్నామని, 2003 DSC బాధ్యతలకు OPS ఇచ్చి తొలి అడుగు వేశామని కూటమి ప్రభుత్వం చెప్తోంది. మిగిలిన ఉద్యోగుల విషయంలో కూడా ఆమోదయోగ్యమైన పరిష్కారం చూపుతామని అంటోంది.

కూటమి తాజా నిర్ణయాన్ని YSRCP తిప్పికొడుతోంది. ఈ జీఓ కేవలం పరిమిత సంఖ్యలో దాదాపు 10,700 మంది ఉద్యోగులకు మాత్రమే వర్తిస్తుందని, తాము గతంలో తెచ్చిన గ్యారెంటీడ్ పెన్షన్ స్కీమ్ ద్వారానే మిగిలిన లక్షలాది మంది ఉద్యోగులకు పూర్తి రక్షణ ఉంటుందని YSRCP వాదిస్తోంది.

ఇప్పుడు APCPSCSA తన తదుపరి పోరాట కార్యాచరణను ప్రకటించి ప్రభుత్వానికి సవాలు విసిరింది. మిగిలిన CPS ఉద్యోగులందరికీ పాత పెన్షన్ విధానం OPS అమలయ్యే వరకు విశ్రమించేది లేదని తేల్చి చెప్పింది. ఇందులో భాగంగా రాబోయే సెప్టెంబర్ 1 పెన్షన్ విద్రోహ దినం సందర్భంగా చలో రాజధాని సమరశంఖం పేరుతో గుంటూరులో భారీ నిరసన ర్యాలీ, బహిరంగ సభ నిర్వహించబోతున్నట్లు ప్రకటించింది. రాష్ట్రంలోని CPS ఉద్యోగులు, ఉపాధ్యాయులు అందరూ ఈ సభకు తరలిరావాలని పిలుపునిచ్చింది.

AP లో 2003 DSC ఉద్యోగులకు OPS జీఓ రావడంతో ఒక అంకం ముగిసినా, అసలైన పోరాటం ముందుముందు ఉందనే సంకేతాలు ఉద్యోగ సంఘాలు పంపుతున్నాయి. GPS, UPS వద్దు కేవలం OPS మాత్రమే అంటున్న ఉద్యోగుల డిమాండ్‌పై ప్రభుత్వం ఎలా స్పందిస్తుందో వేచి చూడాలి.